Ш.Мөнхжаргал: ДЦС-3-ын сүлжээг өнөөдөр залгаж байна. Даваа гарагаас айл өрх, сургууль, цэцэрлэг, эмнэлгийг дулаанаар хангана
Жил бүрийн есдүгээр сарын 15-наас нийслэл хотын орон сууцны айл өрх, сургууль, цэцэрлэг, эмнэлгийн байгууллагыг халаалтын сүлжээнд залгадаг.
Энэ жил халаалтыг хэзээ холбох болон дулааны шугамын засвар, шинэчлэлийн ажил дууссан эсэх талаар "УБДС" ТӨХК-ийн ерөнхий инженер Ш.Мөнхжаргалаас тодруулахад "ДЦС-3-ын халаалтын сүлжээг өнөөдөр залгаж байна. "Амгалан" ДЦС-ын сүлжээг Даваа гарагт залгана.
Есдүгээр сарын 15-наас айл өрх, сургууль, цэцэрлэг, эмнэлэг болон хүсэлт гаргасан ААН, байгууллагын халаалтыг залгана.
Дулаанаар хангах гэрээг байгуулахдаа орон сууцны конторууд болон ААН, байгууллагыг өр төлбөрийн үлдэгдэлгүй байх шаардлагыг тавьж байгаа. Өөрөөр хэлбэл төлбөрийн үлдэгдлээ барагдуултал дулаанаар хангахгүй. Улаанбаатар хотод хувийн 50 орон сууцны контор, Орон Сууц Нийтийн Аж Ахуйн Удирдах Газрын/ОСНААУГ/ хэрэглэгчдэд үйлчлэх төв 19 бий. Орон сууцны конторууд нь оршин суугчдаас авсан төлбөрийг "УБДС" компанид төвлөрүүлдэг юм.
Дулааны шугамын засвар, шинэчлэлийн хувьд Баянгол дүүргийн нутаг дэвсгэр 25 дугаар эмийн сангийн замын эсрэг талд 11Г магистрал шугамыг нийслэлийн хөрөнгө оруулалтаар өргөтгөх ажил үргэлжилж байгаа. Есдүгээр сарын 26-н гэхэд уг ажил дуусах байх. Үндсэн шугамыг өргөтгөж байгаа тул засвараас хамаарахгүйгээр халаалтыг залгана" хэмээн хэллээ.
Харин ОСНААУГ-аас халаалт залгах үеэр буюу есдүгээр сарын 15-16-ны өдрүүдэд орон гэрээ хүнтэй байлгахыг зөвлөжээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
