18 аймаг, гурван дүүргийн наадамд шөвгөрсөн бөхчүүдийн дөрвөөс нь хориглосон бодис илрээд байна
Үндэсний их баяр наадмын тухай хуульд заасны дагуу одоогоор 18 аймаг, гурван дүүргийн наадамд шөвгөрсөн нийт 84 бөхөөс сорьц авчээ. Үүнээс 14 бөхийн сорьцыг нарийвчлан шинжилж буйгаа Герман улсын Дрезден хотын Допингийн анализ болон Спортын Биохимийн Институтийн итгэмжлэгдсэн лабораториос Монголын Үндэсний Бөхийн Холбоо(МҮБХ)-нд мэдэгдсэн байна.
Нарийвчлан шинжилж буй 14 бөхийн сорьцоос Улаанбаатарын цагаар 2025 оны долдугаар сарын 18-ны 22:00 цагийн байдлаар зургаан сорьцын хариу ирсэн бөгөөд дөрвөн бөхөөс хориглосон бодис илэрснийг МҮБХ-ноос мэдээлэв.
Үлдсэн найман бөхийн сорьцын хариу эцэслэгдсэний дараа аймаг дүүргүүдийн баяр наадам зохион байгуулах хороо, комисст хүргүүлж холбогдох дүрэмд заасны дагуу арга хэмжээ авах юм байна. Түүнчлэн Улсын баяр наадмын бөх, сурын допингийн шинжилгээний хариуг Баяр наадам зохион байгуулах хорооноос зарлах журамтайг онцоллоо.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
