Баяр наадмын өдрүүдэд ОБЕГ 66 удаагийн гамшиг, аюулт үзэгдлийн дуудлагын дагуу 94 иргэний амь насыг авран хамгаалжээ

УОК

Баяр наадмын өдрүүдэд /2025.07.10-14/ бүртгэгдсэн 66 удаагийн гамшиг, аюулт үзэгдлийн дуудлагын дагуу төв, орон нутгийн Онцгой байдлын байгууллагын алба хаагчид ажиллаж, 94 иргэний амь насыг авран хамгаалжээ.

Улсын хэмжээнд 21 аймаг, нийслэл, 9 дүүргийн Шуурхай штабт Онцгой байдал, гамшгаас хамгаалах албадын 513  алба хаагч үүрэг гүйцэтгэж байгаа юм байна.

Харин Сэлэнгэ, Баян-Өлгий, Увс, Хэнтий, Завхан, Баянхонгор, Өвөрхангай аймаг болон нийслэлийн Баянзүрх дүүрэг нийт 14 хүн гол, усанд амь насаа алдсаны 2 нь уруйн үерт өртөж, амь насаа алдсан мэдээлэл бүртгэгдсэн байна. 

Монгол Улсын Шадар сайд, УОК-ын дарга С.Амарсайхан нөхцөл байдалтай танилцсаны дараа холбогдох үүрэг чиглэлийг өгчээ.

• Үерийн аюулаас хамгаалах далан, суваг, шуудуунд тогтмол үзлэг шалгалт хийж, гарц, урсацыг нээх, хяналт тавих,
• Ой, хээрийн түймэр, үер, усны ослоос урьдчилан арга хэмжээг тухай бүрд зохион байгуулах,
• Цаг агаарын мэдээ, мэдээллийг хүртээмжтэй хүргэх, олон нийтийн оролцоог хангах, 
• Аймаг, нийслэл, сум, дүүргийн холбогдох мэргэжлийн байгууллагуудын хүн хүч, техник хэрэгслийн бэлэн байдлыг хангуулах зэргийг үүрэг болголоо.

Баяр наадмын амралтын өдрүүдэд хотоос 370 мянга гаруй тээврийн хэрэгсэл орон нутгийг зорьсон байна. Иймд  ард иргэдийг авто осол, гал түймэр, үер усны аюулаас сэрэмжтэй байж өөрийн болон бусдын амь нас, эд хөрөнгөө хамгаалахыг уриалав.