Монгол, Япон хоёр улсын худалдааны эргэлт 1.2 тэрбум ам.долларт хүрчээ
Япон Улсын Цог Жавхлант Эзэн Хаан, Эрхэм Дээд Хатан Монгол Улсад айлчилж буй энэ өдрүүдийг тохиолдуулан хоёр улсын эдийн засгийн харилцааны талаарх мэдээллийг хүргэж байна.
Монгол Улс, Япон Улс хооронд 1972 оны хоёрдугаар сарын 24-нд дипломат харилцаа тогтоосон бөгөөд Монгол Улс 1972 онд Токио хотод, Япон Улс 1973 онд Улаанбаатар хотод тус тус Элчин сайдын яамаа нээж байв.
Хоёр улсын хооронд Эдийн засгийн түншлэлийн хэлэлцээрийг 2015 оны хоёрдугаар сарын 10-ны өдөр байгуулж, уг хэлэлцээр 2016 оны зургаадугаар сарын 7-ны өдрөөс хүчин төгөлдөр үйлчилж байгаа юм. Ийм төрлийн хэлэлцээр нь Монгол Улсын хувьд анхных байсан бол Япон Улсын хувьд 15 дахь нь юм.
Хэлэлцээрээр Монголын тал 5,700 орчим, Японы тал 9,300 орчим төрлийн бараа, бүтээгдэхүүнийг импортын гаалийн тарифаас шууд болон үе шаттайгаар чөлөөлж байна. Үүнд манай улс Японоос импортолж буй 3,423 төрлийн бараа, Япон Улс манай экспортын 8,004 төрлийн бараа, бүтээгдэхүүнийг хэлэлцээр хүчин төгөлдөр болсон өдрөөс эхлэн гаалийн татвараас шууд чөлөөлсөн.
Хүснэгт, Монгол, Японы худалдааны эргэлт, сая ам.доллароор
|
Он |
Нийт эргэлт |
Импорт |
Экспорт |
|---|---|---|---|
|
2015 он |
294.9 |
274.6 |
20.31 |
|
2016 он |
344.6 |
330.6 |
14.03 |
|
2017 он |
378.0 |
363.1 |
14.81 |
|
2018 он |
588.0 |
561.0 |
26.5 |
|
2019 он |
600.9 |
585.4 |
15.51 |
|
2020 он |
416.5 |
406.7 |
9.7 |
|
2021 он |
470.8 |
453.1 |
17.7 |
|
2022 он |
689.4 |
674.2 |
15.2 |
|
2023 он |
731.1 |
716.2 |
14.9 |
|
2024 он |
1,187.5 |
1,175.0 |
12.5 |
|
2025.6 сар |
600.9 |
597.7 |
3.2 |
Гаалийн Ерөнхий Газраас өгсөн мэдээллээр хоёр улсын худалдааны эргэлт 2024 оны арванхоёрдугаар сарын байдлаар 1.2 тэрбум ам.долларт хүрээд буй юм.
Экспортын гол нэрийн бараанд хөнгөн цагаан, хөдөө аж ахуй, малын гаралтай бүтээгдэхүүнүүд дийлэнх хувийг эзэлж, импортын гол нэрийн бараанд суудлын болон ачааны автомашин, хийлдэг шинэ хаймар дугуй, сэргээсэн эсвэл ашиглагдсан дугуй зэрэг бараа дийлэнх хувийг эзэлж байна.
Харин хөнгөлөлттэй зээл, тусламжийн тухайд Япон Улсын Засгийн газраас 1977-2024 оны гуравдугаар сарын байдлаар
- 123.4 тэрбум иенийн буцалтгүй тусламж,
- 182.9 тэрбум иенийн хөнгөлөлттэй зээл,
- 56.5 тэрбум иенийн техникийн хамтын ажиллагаа нийт 362.4 тэрбум иенийн (3.3 тэрбум ам.доллар) зээл, тусламжийг манай улсад үзүүлсэн байна.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
17 СЭТГЭГДЭЛТЭЙ
|
