Ж.Чинбүрэн: Вакцины эсрэг худал мэдээлэл тарааж байгаа асуудалд цагдаа, тагнуулын байгууллагатай хамтран хатуу арга хэмжээ авна

Гэрэл зургийг MPA агентлагийн онцгой зөвшөөрөлтэйгөөр ашиглав

Засгийн газрын хуралдаанаар хэлэлцсэн асуудлын талаар Эрүүл мэндийн сайд Ж.Чинбүрэн мэдээлэл өглөө.

Тэрбээр “Засгийн газрын өмнөх хуралдаануудаар улаанбурхан өвчний тархалтын талаар нэлээн ярьсан. Өнгөрсөн долоо хоногт 8,160 орчим хүн халдвартай байсан бол ердөө долоо хоногийн дотор 1,500-гаар нэмэгдсэн. Харин эндэгдэл байхгүй байгаа нь сайн мэдээ юм. Улаанбурхан өвчний халдварыг хумих, вакцинжуулах зэрэгт зарцуулах таван тэрбум төгрөгийг Засгийн газрын нөөц хөрөнгөөс гаргахаар боллоо.

Ингэснээр бага насны болон сургуулийн насны хүүхдүүдийг хоёр үе шаттайгаар нөхөн вакцинжуулна. Голомтод өртсөн хүмүүст яаралтайгаар наснаас үл хамааран вакцин хийнэ.

Эцэх эхчүүд хүүхдээ вакцинд хамрагдсан эсэхийг нягталж, хийлгээгүй бол дархлаажуулалтад нөхөн хамрагдаарай.

10-15 насны хүүхдүүд вакцин хийлгэсэн ч дархлаа нь суларсан байгаа учраас дахин хийлгэхэд аюултай зүйл байхгүй.

Наадмаар олуулаа цугларсан үед халдвар тарж, 10-15 хоногийн далд үеийн дараагаас буюу долдугаар сарын 20-ны орчмоос халдвар дахин нэмэгдэх эрсдэлтэй байна. Тиймээс эрүүл мэндийн салбарынхан долдугаар сарын 10-н хүртэл эрчимжүүлсэн бэлэн байдалд ажиллаж байгаа.

Мөн цагдаа, тагнуулын байгууллагатай хамтран вакцины эсрэг худал мэдээлэл тарааж байгаа асуудал хатуу арга хэмжээ авч, зогсоох талаар ярилцаж байгаа.

Одоо хэрэглэж байгаа вакциныг Монгол Улс 1973 оноос хойш хэрэглэж байна. Цар тахлын эсрэг вакцин шиг шинэ технологийнх биш. Хүний биед аюулгүй гэдгийг хариуцлагатайгаар хэлье" гэлээ.