Б.Жавхлан: Нүүрсний үнэ оны эхнээс тавдугаар сарын 14-н хүртэл 100 юаниар унасан бол тавдугаар сарын 15-наас хойш 120-130 юаниар унаад байна
Засгийн газрын ээлжит хуралдаанаар хэлэлцсэн асуудлын талаар Сангийн сайд Б.Жавхлан мэдээлэл өглөө.
Сангийн сайд Б.Жавхлан “Өнөөдрийн Засгийн газрын хуралдаанд 2025 оны төсвийн тодотголыг танилцууллаа. Үндсэндээ өнөөдөр Засгийн газар дээр тодотголыг хэлэлцээд эцэслэсэн гэсэн үг. Ингээд төсвийн тодотголыг УИХ-д өргөн мэдүүлэхэд бэлэн болоод байна.
Анх тодотголын хэмжээг танилцуулснаас хойш өөрчлөлт орсон. Энэ удаагийн тодотголыг 2025 оны төсөвт хийж байгаа. Үүнийг дагаад 2025 оны төсвийн хүрээний мэдэгдэлд өөрчлөлт орно. Үүнд өөрчлөлт орохоор 2026, 2027 оны төсвийн төсөөлөлд мөн өөрчлөлт орно. Тиймээс эдгээр өөрчлөлтүүдийг хамтад нь өргөн барина.
Өмнө нь улсын төсвийн орлого 2.3 их наяд төгрөгөөр дутах нь гэж мэдээлж байсан бол эдгээр тоонууд өдөр өдрөөр өөрчлөгдсөөр орлогын гүйцэтгэл 3.3 наяд төгрөгөөр дутах болоод байна.
Ингээд 2925 оны тавдугаар сарын дунд хүртэл нүүрсний үнэ унаж байсан ч харьцангуй тогтвортой байж. Оны эхнээс тавдугаар сарын 14 хүртэл 100 юаниар унасан байсан бол тавдугаар сарын 15-наас хойш буюу ганцхан сарын дотор 120-130 юаниар уналаа. Тиймээс бидний төсөөлж байсан төсвийн гүйцэтгэлд хүчтэй нөлөө үзүүлэх болоод байна.
Тавдугаар сарын 31-ний байдлаар төсвийн гүйцэтгэл 259 тэрбум төгрөгийн алдагдалтай гарсан.
2.3 их наяд гэдэг тооцоолол 2.1 их наяд төгрөг болсон. 200 орчим тэрбум төгрөгийг зардал талдаа буцааж тавихаар өөр аргагүй болсон. Яагаад зөрүү үүссэн гэхээр гурван шалтгаантай.
Нэгдүгээрт, ДЦС III-т гарсан осол болон дулааны тарифын өөрчлөлтийг хойшлуулсантай холбоотойгоор татаас нэмэгдсэн. Эрчим хүчний яамнаас 122 тэрбум төгрөгийг буцааж тавих хүсэлт гаргасныг зөвшилцсөний үндсэн дээр 78 тэрбум төгрөгт багтаахаар болсон.
Хоёрдугаарт, Засгийн газрын нөөц хөрөнгө дээр 50 тэрбум төгрөг нэмж тавихаар болсон. Учир нь Ойрх Дорнодод үүсээд байгаа нөхцөл байдал дэлхийн III дайн ч үүсэж болзошгүй нөхцөл байдалтай байна. Үүнээс бол газрын тосны зах зээлд савлагаа үүсгэнэ. Дээрээс нь манай улсад газрын тосны бүтээгдэхүүний хомсдол үүсэх эрсдэл бий. Тиймээс нөөцөө зузаатгахаас гадна ирэх өвөл хатуу болохоор байгаа. Үүнтэй холбоотойгоор Засгийн газрын нөөц хөрөнгийг 50 тэрбум төгрөгөөр нэмэхээр болсон.
Гуравдугаарт, манай улс ирэх жил COP17 олон улсын хурлыг нутагтаа зохион байгуулна. Үүний бэлтгэл ажилд 50 тэрбум төгрөгийг төсөв Байгаль орчин, уур амьсгалын өөрчлөлтийн яаман дээр байсан боловч тавдугаар сарын 31-ний байдлаар худалдан авах ажиллагаа хийж амжаагүй учраас үүнийг буцааж тавих шаардлага үүсэж байгаа. Ингээд нийт 187 тэрбум төгрөгийг буцааж тавих шаардлага үүссэн.
Өөрөөр хэлбэл, 2025 оны батлагдсан төсвөөс 2.3 их наяд бус 2.1 их наяд төгрөгөөр зардлаа хэмнэнэ.
Бидэнд хүрч болохгүй урсгал зардлууд гэж бий. Жишээ нь, хүүхдийн мөнгө, цалин, тэтгэвэр, тэтгэмжтэй холбоотой тогтмол зардлууд. Тэр хөрөнгө рүү аль болох хүрэхгүй.
Энэ удаагийн төсвийн тодотголыг ард иргэдийн нуруунд үүрүүлэхгүй" гэв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
52 СЭТГЭГДЭЛТЭЙ
|
