"Улсын хэмжээнд улаанбурхан өвчний 9,096 тохиолдол батлагдсаны 46.9 хувь нь Улаанбаатар хотод байна"
Нийслэлийн Онцгой комиссын II хурал өнөөдөр болж, улаанбурхан өвчний нөхцөл байдал, авч хэрэгжүүлж буй арга хэмжээний талаар хэлэлцэв.
Зургаадугаар сарын 20-ны өдрийн байдлаар улсын хэмжээнд улаанбурхан өвчний батлагдсан 9,096 тохиолдол бүртгэгдсэн бол үүний 46.9 хувь нь Улаанбаатар хотод бүртгэгджээ.
Энэ талаар НЭМГ-ын дарга Х.Бат-Ирээдүй “Нийт хавьтал болсон 54,360 хүүхдээс УГУ бүрэн тунд 14,924 хүүхэд хамрагдсан байна. Дархлаажуулалтын бүрэн тунгаа аваагүй 39,436 хүүхэд байсан. Үүнээс 32,042 хүүхдийг дархлаажуулалтад хамруулаад байна.
Түүнчлэн дархлаажуулалтаас хоцорсон нөхөн дархлаажуулах шаардлагатай 10-14 насны 42,505 хүүхэд байна” гэлээ.
НОК-оос:
- Улаанбурхан өвчний тандалт, дархлаажуулалт, урьдчилан сэргийлэх арга хэмжээний бэлэн байдлыг хангуулах, эрүүл мэндийн төвүүдийн хүний нөөц, эм тарианы нөөцийн судалгааг гаргуулан эм, эмнэлгийн хэрэгслийн шаардлагатай хөрөнгийг шийдвэрлэх,
- Дүүргийн хэмжээнд үйл ажиллагаа явуулж буй хүүхдийн зуслан, асрамжийн төв, халамжийн газар, хүүхдийн сувиллуудад хяналт, шалгалтыг зохион байгуулж, вакцинжуулалтад хамруулах, халдвар тархах эрсдэлээс сэргийлэх,
- Товлолт дархлаажуулалтаас хоцорсон 0–15 насны хүүхдүүдийн судалгааг шинэчлэн гаргаж, дархлаажуулалтад хамруулах ажлыг эрчимжүүлэх, дархлаажуулалтыг ирэх сарын 10-ны өдрөөс өмнө 95 хувьд хүргэхээр төлөвлөжээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
