Ж.Энхбаяр vs А.Ариунзаяа: Импортын гурилыг гаалийн албан татвараас чөлөөлөх нь БУРУУ, ЗӨВ

Гэрэл зургийг MPA агентлагийн онцгой зөвшөөрөлтэйгөөр ашиглав

Гаалийн албан татвараас чөлөөлөх тухай хууль хүчингүй болсонд тооцох тухай хуулийн төслийг УИХ-аар хэлэлцээд уг хуулийг хүчингүй болгохгүй гэдэг шийдвэр гаргалаа. Өөрөөр хэлбэл, импортын гурилыг гаалийн албан татвараас чөлөөлсөн шийдвэр хэвээр үргэлжлэхээр болж байна.

Одоогоос нэг жилийн өмнө УИХ-ын шийдвэрээр импортын гурил, малын тэжээлийн гаалийн татварыг тэглэсэн. Харин Засгийн газраас уг шийдвэрийг хүчингүй болгуулах тухай хуулийн төсөл өргөн барьсныг УИХ хэлэлцээд өнөөдөр шийдвэр гаргасан нь энэ юм.

Үүнтэй холбогдуулан Хүнс, хөдөө аж ахуй, хөнгөн үйлдвэрийн сайд Ж.Энхбаяр болоод түүний эсрэг УИХ-ын гишүүн А.Ариунзаяа нар мэдээлэл хийлээ.

Тэрбээр “Сая УИХ Монгол Улсын хөдөө аж ахуй, түүний тулгуур болсон газар тариалангийн үйлдвэрлэлийн түүхэнд хараар бичигдэх хуулийг баталлаа. Үндсэндээ Монгол Улс улаан буудай, үр тариан үйлдвэрлэл явуулах шаардлагагүй гэдэг бодлого гаргаж байна. Энэ бол Монгол Улсын үндэсний эрх ашиг, аюулгүй байдалд харш шийдвэр юм.

 

Гэрэл зургийг MPA агентлагийн онцгой зөвшөөрөлтэйгөөр ашиглав

Ялангуяа энэ шийдвэрийг гаргах ажлыг УИХ-ын дарга зохион байгуулж байгаад сэтгэл хангалуун бус байна. Хаврын тариалалт ид явагдаж байгаа энэ үед Монголд улаанбуудай хэрэггүй, дотооддоо гурил үйлдвэрлэх шаардлагагүй, импортоор хангана гэлээ.

Өнгөрсөн парламентаас баталсан энэ шийдвэрээс болж газар тариалангийн салбар эрс унаж, гурил үйлдвэрлэл багассан. Олон сая ам.доллароор гаднаас гурил, малын тэжээл авдаг болчхоод байна. Үүнийг засъя гэдэг бодлогыг их хурал дэмжсэнгүй.

Хамгийн харамсалтай нь УИХ-ын дарга өөрөө чуулганы индэр дээрээс чиглүүлж, зохион байгуулсанд гутлаа. Монгол Улсын Ерөнхийлөгч, ҮАБЗ-ийн тэргүүн энэ асуудалд хориг тавина гэдэгт итгэлтэй байна” гэлээ.

Харин импортын гурилын гаалийн албан татвараас чөлөөлөх нь зүйтэй гэж үзсэн гишүүдийн төлөөлөл болох А.Ариунзаяа сэтгүүлчдийн асуултад хариулав. 

Тэрбээр “Гурилан бүтээгдэхүүний үнэ сүүлийн нэг жилийн хугацаанд буурч байгаа нь татвар тэглэсэнтэй холбоотой. Ялангуяа алслагдсан аймгуудад гурилын үнийн өсөлт иргэдийн амьжиргаанд нөлөөлж байсныг шийдвэрлэсэн.

 

Гэрэл зургийг MPA агентлагийн онцгой зөвшөөрөлтэйгөөр ашиглав

Тариаланчдын тоо буурч байгаа нь өмнө нь ч байсан. Татвар тэглэснээс болж гурил үйлдвэрлэгчдийн тоо болон гурилын үйлдвэрлэл буурсан гэдэг тоо баримт хоорондоо нийцэхгүй байна.

Гурилын сорт, чанар, тариалалт зэрэг нь тусдаа асуудал. Тариаланчдыг дэмжих чиглэлээр өмнө нь олгосон зээл тусламжууд яаж ашиглагдсан зэргийг шалгаж байсан.  

Харин яг өнөөдөртөө тулгамдаж байгаа асуудлыг шийдвэрлэх гарц, гаргалгаа хийгээгүй байж зөвхөн татвартай холбож гурил үйлдвэрлэгчийн асуудлыг оруулж ирнэ гэдэг буруу юм.

Улаанбаатарт гурил 2,000 төгрөг байхад Говь-Алтай аймагт 3,600 төгрөгийн үнэтэй байсан. Тиймээс алслагдсан аймгийн иргэд татваргүй гурил хэрэглэх эрх нь байх ёстой. Энэ асуудлыг дахин оруулж ирж болно. Тэгэхдээ бүсчилсэн байдлаар татварыг ялгамжтай тогтоож өгөх ёстой гэж үзэж байгаа. Гурилын үнэ иргэдийн амьжиргаанд хамгийн томоор нөлөөлдөг. Тиймээс би хувьдаа иргэд хямд гурил хэрэглэх ёстой гэдэг үүднээс сонголт хийсэн" гэв.