Цахилгааны утсанд орооцолдон шархадсан шувууг эдгээж, байгальд тавьжээ
Нүүдлийн шувуу цахилгааны утсанд орооцолдож бэртсэн байсныг эмчилж, байгальд буцаан тавьжээ.
Нийслэлийн Байгаль Орчны Газраас мэдээлснээр Баянзүрх дүүргийн гуравдугаар хорооны орон сууцны хороолол дунд гэмтсэн шувуу байна гэсэн иргэний мэдээллийн дагуу амьтны эмч газар дээр нь очиход гэзэгт шумбуур (Aythya fuligula) шувуу цахилгааны утсанд орооцолдож хүзүү хэсэг нь шархалжээ. Бэртсэн шувууг “Зэрлэг амьтан асрах байранд“ хүргэж долоо хоног эмчлэн байгальд эргүүлэн тавьсан байна.
Гэзэгт шумбуур (Aythya fuligula) нь Монгол оронд түгээмэл тархсан нуур цөөрөм, задгай усанд өндөглөн зусдаг нүүдлийн шувуу юм. Үржлийн үедээ усны ойролцоо навч, мөчрөөр үүр засан 6-12 өндөг гаргана. Элдэв нялцгай биетэн, усны хорхой шавж, ургамлаар хооллодог.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
