"Мод тарих нэрээр далимдуулж, зүсээ хувиргасан газрын далд наймаа ил гарч эхэллээ"

Гэрэл зургийг MPA агентлагийн онцгой зөвшөөрөлтэйгөөр ашиглав

Төв аймгийн Батсүмбэр сумын нутаг Суварга хайрхны урд хэсэгт хууль бусаар газар олгосон асуудлаар нутгийн иргэд нь өнөөдөр Үндэсний Мэдээллийн Төвд хэвлэлийн хурал зохион байгууллаа.

Сумын иргэдийн төлөөлөл "Зайран Э гэгч хүн Төв аймгийн Батсүмбэр суманд 100,000 мод тарина гээд ямар ч зөвшөөрөл байхгүйгээр 20-30 га талбайд дур мэдэн газар хагалсан байна. Бид газар дээр нь очсон. Яагаад дураараа газар хагалсан тухайг асуухад үл ойлголцол үүсэж, өөдөөс хариулаагүй, Газрын тухай хуулийг зөрчсөн ноцтой үйлдэл хийсэн.

Газрын тухай хуулийн холбогдох заалтаар газрыг өмчлөх, ашиглах, эзэмших зориулалтаар иргэн, аж ахуйн нэгжид олгодог. Ингэхдээ тухайн жилийн сумын хөгжлийн дундын болон урт хугацааны төлөвлөлтүүдэд холбогдох журмыг үндэслэн боловсруулан хэрэгжүүлдэг. Гэтэл манай сумын Засаг дарга Захиргааны ерөнхий хуулийн дагуу иргэдтэйгээ сонсгол нэг ч хийгээгүй. Ард иргэдийг үл ойшоосон.

Монгол Улсын Ерөнхийлөгчийн зарлигаар "Тэрбум мод" хөтөлбөр улс орон даяар хэрэгжиж байгаа нь үнэн ч үүгээр далимдуулж, зүсээ хувиргасан газрын далд наймаа ил гарч эхэллээ. Засаг даргатай чинь ярьсан гээд дурын нөхөр газар ухаж байгаа нь харамсалтай байна. Ийм зүйл дэлгэрэх нь байна. Эхнийх нь манай суманд нүүрлэлээ. Үүнийг таслан зогсоож, бусад аймаг сумдад анхааруулж энэ хурлыг хийж байгаа.

Үнэхээр мод тарих гэж байгаа бол тарьж болно, гол нь хууль дүрмийн дагуу хийх хэрэгтэй. Тиймээс дур мэдсэн энэ асуудлаар холбогдох албан тушаалтнуудыг хууль хяналтын байгууллагад шалгуулна. Үүнийг зогсооно" гэв.

Төв аймгийн Батсүмбэр сумын Иргэдийн Төлөөлөгчдийн Хурал(ИТХ)-ын төлөөлөгч Б.Лхагвасүрэн "Суварга хайрхны урд 20 га орчим талбайд ямар ч зөвшөөрөлгүйгээр хашаа хатгаад, газар хагалаад мод тарина гэж байна. Энэ нь нэгдүгээрт Газрын тухай хуулийг зөрчсөн. Хоёрдугаарт тухайн орон нутгийн иргэдийн мэдэх эрхийг ноцтой зөрчлөө. 

Ямарваа нэг үйл ажиллагаа явуулахад хуулиа баримталж, зохих ёсны зөвшөөрөл, гэрээ зэргийг баримт бичгээ болгодог. Гэтэл эдгээр хүн дур мэдэж үйл ажиллагаа явуулж байгаа нь хуулиас давсан эрх мэдэлтэй байна гэж үзэж байгаа. Үүнд хуулийн дагуу арга хэмжээ авч, иргэдэд эцсийн шийдээ мэдээлэх ёстой. Хууль бус үйл ажиллагаагаа таслан зогсоо. Хэрэв хууль дүрмийн дагуу олгогдсон бол иргэдэд мэдээллээ өг гэж байгаа юм" хэмээв.