Гэрэл зургийг MPA агентлагийн онцгой зөвшөөрөлтэйгөөр ашиглав

Засгийн газрын ээлжит хуралдаан болж, зарим шийдвэрийг танилцууллаа. 

Өнөөдрийн хуралдаанаар: 

Тавантолгой ордын "Бор тээг"-ийн уурхайд “Эрдэнэс Тавантолгой” компани болон “Админерал” зэрэг түншлэлийн компани 2021 оны арваннэгдүгээр сарын 17-нд хөрс хуулалт, өрөмдлөг, тэсэлгээ, нүүрс олборлолт, баяжуулалтын гэрээ байгуулсныг хүчингүй болгож шийдвэрлэсэн гэдгийг ЗГХЭГ-ын дарга Н.Учрал хэлэв. 

"Бор тээгийн уурхайн МТАС түншлэлийн гэрээг хүчингүй болгож шийдвэрлэлээ"

Энэ талаар тэрбээр "Үндэсний баялгийн сангийн тухай хуулийн хэрэгжилтийг хангуулах Ажлын хэсгийн ахлагчийн хувиар хэд хэдэн асуудлыг хөндье.

Сайн мэдээ гэвэл Тавантолгой ордын "Бор тээг"-ийн уурхайд зарим түншлэлийн компани 2021 онд хөрс хуулалт, өрөмдлөг, тэсэлгээ, нүүрс олборлолт, баяжуулалтын гэрээ байгуулсныг хүчингүй болгож байгаа.

УИХ-ын 2024 оны есдүгээр тогтоолоор Засгийн газарт даалгасныг ийнхүү бодитой ажил, шийдвэр болгож чадсанаа дуулгая.

ЗГХЭГ-ын даргын хувиар өнгөрсөн хугацаанд МТАС түншлэлтэй холбогдон байгуулсан гэрээг УИХ-ын тогтоолыг хэрэгжүүлэх чиглэлээр хуульд нийцүүлэх, хуулийн хэрэгжилтийг хангуулах чиглэлд тушаал гаргаад дээрх гэрээг хүчингүй болгох санал үндэслэлийг боловсруулах багийг өнгөрсөн хугацаанд ажиллуулсан.

Энэ баг эцсийн санал дүгнэлтээ танилцуулсан байгаа. Тэрхүү санал, дүгнэлтэд үндэслээд Засгийн газар шийдвэрээ гаргасан. Одоо Төлөөлөн Удирдах Зөвлөл хуралдаж, МТАС түншлэлийн гэрээг хүчингүй болгоно" гэв. 

"Монголын баялгаар муур, хулгана шиг тоглосон ийм үйлдлүүд дахин давтагдвал Монголын хууль дуудах ёстой"

Үргэлжлүүлэн "Дараагийн асуудал бол Төгрөг нуурын орд. 

Сүүлийн үед намайг ганцхан Төгрөг нуурын ордтой л зууралдаад байна гэх янз бүрийн мэдээлэл гараад буй. 

Хуулийн байгууллага хурдан хугацаанд ажиллаж, Авлигатай Тэмцэх Газар (АТГ)-т хэрэг бүртгэл нээж ажиллаж эхэлсэн.

Харин өнөөдөр авсан мэдээллээр Улсын ерөнхий прокурорын шийдвэрээр АТГ, цагдаа, прокурорын хамтарсан өргөн бүрэлдэхүүнтэй ажлын хэсэг байгуулагдан ажилдаа оржээ.

• Мөнгө угаах,
• татвараас зайлсхийх,
• албан тушаалаа урвуулан ашигласан зэрэг зүйл ангиар Эрүүгийн хэрэг үүсгэн мөрдөн шалгах ажиллагаа эхэлж байгаа гэх хуулийн байгууллагын мэдээллийг авлаа.

30 гаруй ордын зөвхөн нэг ордод хийсэн санхүүгийн шинжилгээнээс асуудал илэрсэн. Төр авсан хойно өч төчнөөн гадаадын эзэд гарч ирж, хувьцаа мөнгөө нэхэж, олон улсын шүүхэд улсаараа дуудагдвал яах вэ гэдгийг бодох ёстой.

Орон сууцаар жишээ болгож ярихад анхны эзэн огт зөвшөөрөөгүй байхад зарсан. Тэрийг бүх шатны шүүх нь баталчихсан. Гэрчилгээ нь олдохгүй, гадна, дотнын банк, ломбардад тавьсан, асар өндөр үнээр зарсан атлаа мөнгө нь алга болсон. Эцэст нь ямар ч үнэгүй болоод Монголд буцаагаад оруулаад ирсэн.

Ийм хэл амтай, ийм учир битүүлэг орон байрыг ямар ч хүн нүдээ аниад авахгүй шүү дээ. Тэр байтугай машин тэрэг авахад хүртэл яаж эдэлж хэрэглэснийг шалгаад тогтоодогтой яг адилхан.

Тиймээс дээрх асуудалд санхүү болон хуулийн хяналт шинжилгээ хийж асуудлыг ухаалаг шийдэх ёстой" гэдгийг ЗГХЭГ-ын дарга Н.Учрал ярилаа.