Дүүжин тээврийн тоног төхөөрөмжүүд болох 149 чингэлэг ачааны тав нь Францаас Улаанбаатарт иржээ
Дүүжин замын тээврийн “Яармаг, Арцат – Өнөр хороолол” чиглэлийн барилга угсралтын ажлыг энэ оны IV улиралд багтаан дуусгахаар зорьж буйг төсөл хэрэгжүүлэгч нэгжээс мэдэгдээд буй.
Хан-Уул болон Баянгол дүүргийг холбох дүүжин замын тээврийн төслийн нэгдүгээр шугамын дагуу 7.5-42 метрийн өндөр, 19 тулгуур багана болон хоёр буудлыг барихаар төлөвлөсөн. Тулгуур баганын суурь нь шон суурь, нил суурь гэсэн хоёр хэсгээс бүрдэх бөгөөд одоогоор 16 тулгуур баганын шон суурийн өрөмдлөг, арматурчлал, бетон цутгалтын ажил, хоёр тулгуур баганын нил суурийн ухмалын ажил хийгджээ.
Харин шаардлагатай тоног төхөөрөмжүүд Франц улсаас хуваарийн дагуу ирсээр байгаа аж. Өнгөрсөн хугацаанд барилгын ажилд шаардлагатай жижиг хэрэгслүүд болох боолт, буудлын тоног төхөөрөмжүүдийг багтаасан хоёр чингэлэг буусан бол өчигдөр ган татлагын дамар ачсан гурван чингэлэг ачаа иржээ. Ингэснээр 149 чингэлэг ачааны тав нь Улаанбаатарт буусан бөгөөд Монгол Улсын хил рүү 54 чингэлэг ачаа тээвэрлэгдэн ирж байгаа юм байна.
Цаашид Яармаг, Арцат дахь нэг га талбайд 98 кабины гарааш болон засвар үйлчилгээний цех, авто зогсоол, тулгууруудын бүтээцийн ажил зэрэгцэн хийгдэх тул бэлтгэл ажлуудыг хангаж байгааг Улаанбаатар хотын замын түгжрэлийг бууруулах нэгдсэн төслөөс мэдээллээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
21 СЭТГЭГДЭЛТЭЙ
|
