ФОТО: "Бишрэлт Металл" баг сагсан бөмбөгийн Үндэсний дээд лигийн аваргын төлөө өрсөлдөхөөр болов
Монголын Сагсан Бөмбөгийн Холбооны Үндэсний Дээд лигийн хагас шигшээ шатанд учраа таарсан "Эс Жи Эйпс", "Бишрэлт Металл" багийн долоо дахь тоглолт өчигдөр "М банк арена"-д боллоо.
"Эс Жи Эйпс" баг энэ цувралын эхний гурван тоглолтод хожоод байсан бол "Бишрэлт Металл" баг сүүлийн гурван тоглолтод ялалт байгуулсан. Улмаар цувралыг шийдвэрлэх долоо дахь тоглолтод "Бишрэлт Металл" баг өрсөлдөгчөө зургаан онооны зөрүүтэй буюу 67:61-ээр хожлоо.
Ингэснээр тэд Үндэсний Дээд лигийн 2024-2025 оны аваргын төлөө "Хасын Хүлэгүүд" багтай дахин тоглохоор болж байна. Тэд өнгөрсөн жил "Хасын Хүлэгүүд" багтай аваргын төлөө тоглосон боловч хожиж чадаагүй. Мөн гурван жил дараалан Үндэсний дээд лигийн аваргын төлөө тоглохоор болж байгаа юм.
Мөн цувралыг шийдвэрлэх чухал тоглолтын дундуур "Эс Жи Эйпс" багийн гол хоёр тоглогч талбайг орхисон нь харамсалтай үйл явдал боллоо. Тодруулбал Крис Клайбөрн тоглолтын эхний хагаст бэртлээс болж, Б.Тулуй хоёр удаа спортын бус алдаа гаргасны улмаас тоглолтоо дуусгах боломжгүй болсон.
ФОТО:
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
