А.Энхжин: Тодорхой бус байдал нэмэгдсэнээс шалтгаалж Найман шарга худалдааны төв дээр бэлэн валютын эрэлт өсөж байна
Дөрөвдүгээр сарын 7-нд ам.долларын төгрөгтэй тэнцэх албан ханш 3,508.4 төгрөг байсан бол дөрөвдүгээр сарын 8-нд 3,522.48 төгрөг болж огцом өөрчлөгдсөн билээ. Өнөөдрийн байдлаар ам.долларын төгрөгтэй тэнцэх ханш 3,533 төгрөг болоод байгаа юм.
Уг нь 2022 оноос хойш төгрөгийн ханш ингэж огцом суларч байсангүй. Өмнөх үзүүлэлтүүдийг харвал 2016 онд нэг өдрийн дотор 49 төгрөгөөр суларч байжээ. Энэ талаар Монголбанкнаас тодруулахад "Төлбөрийн тэнцлээс шалтгаалан төгрөгийн ханш сулрах дарамт 2025 оны нэгдүгээр улиралд харьцангуй өндөр байв.
Цаашид төлбөрийн тэнцлийн алдагдал буурах, олон улсын зах зээлд ам.долларын ханш сулрах, төгрөгийн харьцангуй өгөөж нэмэгдсэн зэрэг хүчин зүйлсээс шалтгаалан төгрөгийн ханш сулрах дарамт буурах хүлээлттэй байна" гэж байв.
Тэгвэл өнөөдөр Монголбанкны удирдлагууд эдийн засгийн сэтгүүлчидтэй зангиагүй уулзалт хийх үеэр өнгөрсөн долоо хоногт ам.долларын төгрөгтэй тэнцэх албан ханш яагаад огцом өссөн талаар мэдээлэл өглөө.
Монголбанкны нөөцийн удирдлага, санхүүгийн зах зээлийн газрын захирал А.Энхжин "Валютын захын нийт эргэлтийн 95-аас дээш хувь нь банк хооронд эргэлддэг. Үлдсэн 4-5 хувь нь Найман шарга худалдааны төвд бий. Найман шарга худалдааны төв дээр байгаа ханш банк хоорондын ханшаас 10-20 төгрөгийн зөрүүтэй. Бид бэлэн валютыг импортоор оруулж ирдэг. Бэлэн валютыг оруулж ирэх ханш нь бэлэн бусаас 0.5 хувиар илүү. Тэгэхээр үүнийг Найман шарга худалдааны төвд зарж буй валютын ханшид шингээж өгдөг гэсэн үг.
Сүүлийн өдрүүдэд тодорхой бус байдал нэмэгдсэнээс шалтгаалж Найман шарга худалдааны төв дээр бэлэн валютын эрэлт өсөж байна. Тус төвд банк бус байгууллагын тусгай зөвшөөрөлтэй валют солилцооны 54 цэг ажилладаг.
Үүнийг бидний зүгээс ажиглаж байгаа. Түр зуурын шинжтэй хэлбэл нь тус төвийн валютын эрэлтээс шалтгаалж байгаа. Дунд болон урт хугацаанд гэвэл Монгол Улсын эдийн засгийн нөхцөл байдал сайн. Хэдийгээр бид урд хөршөөс хамааралтай ч гэсэн байгалийн асар их баялагтай. Зарим нэг бүтцийн шинжтэй арга хэмжээг шийдчихвэл ирээдүйд ханшийн хэлбэлзэл тогтворжино" гэв.
Үргэлжлүүлэн эдийн засгийн онолын хувьд ам.долларын төгрөгтэй тэнцэх албан ханш яагаад суларсан талаар Монголбанкны Мөнгөний бодлогын газрын захирал Б.Баярдаваа тайлбарлав.
Тэрбээр "Эдийн засаг нь өрсөлдөх чадвар өндөртэй улс орнуудын валютын ханш чангарч байдаг. Учир нь тухайн эдийн засаг хэр их бараа бүтээгдэхүүнээ экспортолж байгаа, гадаадын хөрөнгө оруулалт, бизнес идэвхжиж байгаа эсэхээс хамаарч валютын ханш нь чангардаг.
Улс орнууд аж үйлдвэржилтийн тодорхой түвшинд хүрээд, дэлхийн бараа бүтээгдэхүүний зах зээлтэй өрсөлдөж эхлэхэд тухайн орны валютын ханш чангардаг гэсэн үг" гэлээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
