Л.Оюун-Эрдэнэ: Эгийн голын УЦС-ын сөрөг нөлөөлөл өмнө нь тооцож байсныг бодвол харьцангуй бага гэх дүгнэлт гарсан
Ерөнхий сайд Л.Оюун-Эрдэнэ УИХ-ын чуулганы өнөөдрийн хуралдааны үеэр Засгийн газрын 2024-2028 оны үйл ажиллагааны хөтөлбөрийн 2024 оны гүйцэтгэлийн тайлан болон Монгол Улсын хөгжлийн 2024 оны төлөвлөгөөний гүйцэтгэлийн тайланг танилцууллаа.
Энэ үеэр Эгийн голын Усан цахилгаан станцын хамтарсан судалгааны тайлангийн талаар мэдээлэл өгөв. Тэрбээр "Засгийн газрын зүгээс Эгийн голын усан цахилгаан станцын төсөл дээр төвлөрөн ажиллаж байгаа.
Энэ төсөл гацсан гол шалтгаан бол цаг уур болон Байгаль нууртай холбоотой байгалийн сөрөг нөлөөлөл байна гэдэг байдлаар ОХУ-ын эрдэмтэд, 3-4 төрийн бус байгууллага мэдэгдэл гаргасан. Үүнтэй холбогдуулан хамтарсан ажлын хэсэг байгуулаад эхний дүгнэлтээр өмнө нь тооцож байсан сөрөг нөлөөллийг бодвол харьцангуй бага байна гэсэн дүгнэлт гарсан. Эгийн голын усан цахилгаан станцын төсөл Засгийн газар УИХ-тай хамтран ажиллана.
БНХАУ-тай ярьж байсан томоохон хэд хэдэн төслүүд зорилтоо хангасан. Тиймээс ОХУ, БНХАУ-тай хамтран хэрэгжүүлэх хийн хоолойн төсөл бий. Энэ төсөл хэрэгжсэнээр Улаанбаатар хотыг хийн түлшээр хангах зорилго зарчмын хувьд том шийдэл болно. Мөн төмөр замын баруун, зүүн коридорын төслүүдээ хэрэгжүүлэх цаг хугацаа хэмээн харж байгаа" хэмээн ярилаа.
ШУУД ҮЗЭХ:
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
