Б.Дэлгэрсайхан: Ханги-Мандал, Гашуунсухайт-Ганц мод хоорондын төмөр замын тээврийн тарифыг 50 хувиар бууруулсан
Засгийн газрын өнөөдрийн хуралдаанаар нүүрсний тээврийг оновчтой зохион байгуулах, хил дээрх нүүрсний овоолгыг яаралтай шийдэх, уул уурхайн бүтээгдэхүүний экспортыг богино хугацаанд эрчимжүүлэх, валютын нөөцийг нэмэх Ажлын хэсэг өнгөрсөн долоо хоногт Ханги, Гашуунсухайт, Шивээхүрэнгийн боомтын нөхцөл байдалтай танилцсан талаараа танилцуулжээ.
Энэ талаар Зам, тээврийн сайд Б.Дэлгэрсайхан "Зам, тээврийн яамнаас Ханги-Мандал талдаа явж байгаа төмөр замын тарифыг 50 хувиар бууруулсан. Энэ нь суурь бүтцийн тарифыг 50 хувь бууруулсан гэсэн үг юм. Дээгүүр нь явж байгаа хөдлөх бүрэлдэхүүний тарифыг бууруулаагүй. Гашуунсухайт-Ганц мод хооронд хийгдэж байгаа төмөр замын тээврийн тарифыг мөн 50 хувиар багасгаж байна.
Төмөр замын тарифыг буулгах нь аль ч төмөр замд байдаг хэвийн зүйл юм. Өмнө нь Тавантолгойн тооцоолсон тариф өндөр гараад байсан учир төмөр замаа урт хугацаандаа хэрэглэж өртгөө нөхнө гэж үзэж, энэ хэмжээнд тарифыг буулгасан.
Мөн машины тээврийн зардал, ачигдаж байгаа нүүрсний зардлыг буулгахад анхаарч Зам, тээврийн яамнаас ажлын хэсэг гарсан газар дээр нь ажиллаж байна. Хилийн боомтоор гарч байгаа хэсэг дээр чингэлэг буулгах, машин дээр ачих, хилээр гаргах зардлыг хэмнэх боломжийг илэрхийлж байна.
Ханги боомт дээр 300-400 машин, Гашуунсухайт дээр 250-300 машин гарч байна. Шивээхүрэн, Сэхээ боомт дээр очиход 600 гаруй машин гарч байсан. Тус боомтуудын нүүрсний гаралт хэвийн байна. Цаашид экспорт нэмэгдэнэ. Овоолготой байгаа газар нь Ганцмод-Гашуунсухайт байна. Бүтээн байгуулалтын ажил эхлэх үед экспорт нэмэгдэнэ" гэв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
5 СЭТГЭГДЭЛТЭЙ
|
