О.Уламсайхан: Фэйсбүүкийн зохиомол нэртэй хаягаас чатаар хэлсэн гомдлын мөрөөр хойшлуулшгүй ажиллагаа явуулж биднийг баривчилсан

Гэрэл зургийг MPA агентлагийн онцгой зөвшөөрөлтэйгөөр ашиглав

Цагдаагийн байгууллагаас өнгөрөгч шөнө noorog.mn сайтын редакцад шалгалт явуулж, техник хэрэгслийг нь битүүмжлэн, ажилтнуудаас нь байцаалт авчээ.

Энэ талаар тус сайтын гүйцэтгэх захирал О.Уламсайхан хэвлэлд мэдээлэл өглөө.

Тэрбээр “Өчигдрөөс хойш маш олон шинэ үгтэй танилцаж байна. Жишээ нь хойшлуулшгүй ажиллагаа. Хойшлуулшгүй ажиллагаа гэдэг нь тухайн сэжигтэн нотлох баримтыг нуун дарагдуулах гээд эсвэл гадаад руу оргон зайлах гээд байгаа тохиолдолд ашигладаг үг хэллэг юм байна. Гэтэл бид зүгээр л цэргийн баярын өмнөх өдөр ажлынхнаараа "Counter Strike" тоглоод сууж байсан.

Кибер гэмт хэрэгтэй тэмцэх газраас урьд шөнө 21:00 цагийн үед бидний байгаа газарт ирсэн. Ингээд бүх холбоо барих хэрэгслийг хурааж аваад Кибер гэмт хэрэгтэй тэмцэх газарт авчирсан. Өмгөөлөгчтэй холбогдох гэсэн боломж холбоо барих боломжгүй байсан. Ямар үндэслэлээр ингэж байгааг нь асуухад “Та нарын хийдэг ажилтай холбоотой” гэж хэлсэн.

Хамгийн сүүлийн гурван хүнээс 06:30 цагийн үед байцаалт авсан. Ингэхдээ Эрүүгийн хуулийн 19.9.1 буюу “Үндэсний эв нэгдлийг бусниулах” гэдэг зүйл заалтыг үндэслэж биднийг баривчлах саналыг прокурор руу илгээсэн. Прокуророос хариу иртэл бид ямар ч холбоо барих хэрэгсэлгүй, өмгөөлөгчтэйгөө холбогдож чадахгүй байсан.

Бидний хийж байгаа сонгуулийн 18 хоногийг харуулсан баримтат кинонд хууль бус үйлдлийг харуулсан дүрс байхгүй. Гэхдээ Монголд сонгууль яаж шударга бус явагддаг вэ гэдгийг хангалттай харуулахаар дүрснүүд байгаа.

Бидэнтэй холбоотой гомдлыг цагдаагийн байгууллагад гаргагч нь чатаар холбогдсон байсан. Кибер гэмт хэрэгтэй тэмцэх хэлтэс рүү чатаар холбогдоод бидний хийдэг бичлэгээс болж хүн амиа хорлох гээд байна гэсэн юм билээ. Үүнийг ахлах мөрдөн байцаагч нь өөрөө танилцуулсан. Фэйсбүүкийн зохиомол нэртэй хаягаас чатаар хэлсэн гомдлын мөрөөр хойшлуулшгүй ажиллагаа явуулж баривчилсан" хэмээн ярилаа. 

Тус редакцыг MCS групптэй хамааралтай гэх мэдээлэл цацагдаж эхлээд буй. Үүнд “Монголд байгаа бүх медиа агентлагууд том компаниудтай гэрээ байгуулж ажилладаг. Ажиллаж байсан гэдэг нь бизнес хамтрал. Түүнээс биш мөнгө өгөөд noorog дээр ингээд өг гэдэг маркетингийн менежер байхгүй" гэдэг хариулт өгөв.