Б.Даваабаяр: Зөрчил гаргаж барьсан барилга байгууламжийг албадан буулгах, газрын зөвшөөрлийг цуцлах арга хэмжээ авна

Нийслэлийн есөн дүүргийн нутаг дэвсгэрт зөрчил арилгах хяналт шалгалтыг өнөөдрөөс буюу гуравдугаар сарын 10-ны өдрөөс нийслэлийн холбогдох арав гаруй мэргэжлийн байгууллага хамтарч дүүрэг тус бүрийг гурван хэсэгт хуваан тавдугаар сарын 10-ны өдрийг хүртэл хийхээр болжээ.

УБЗАА-ны Хот тохижилтын хэлтсийн дарга Б.Даваабаяр “Хяналт шалгалт хийхдээ зөрчил гаргасан иргэн, аж ахуйн нэгжийн газар эзэмших, ашиглах эрхийг хүчингүй болгох, газрыг чөлөөлөх, зөвшөөрөлгүй болон зөрчил гаргаж барьсан барилга байгууламжийг албадан буулгах, эрсдэл учруулж буй эд зүйл, техник хэрэгслийг хураах зэргээр шаардлагатай тохиолдолд холбогдох арга хэмжээг авч, Хотын стандартыг мөрдүүлэх чиг үүргийг хэрэгжүүлнэ” гэв.

 

Хотын стандартыг мөрдүүлэх хүрээнд дараах зөрчлийг арилгуулна. Тодруулбал

• Зөрчилтэй эзэмших, ашиглах эрхтэй газар, хашаа, хайс, байгууламж;
• Хууль тогтоомж, барилгын норм ба дүрэм зөрчсөн барилга байгууламж;
• Нийтийн эзэмшлийн зам талбайд зөвшөөрөлгүй байрлуулсан түр байгууламж, өргөтгөл;
• Хаягийн байгууламж, самбар, гадна хаяг;
• Гэрэлтүүлгийн шон, замын тэмдэг тэмдэглэгээ;
• Гудамж талбайн хогийн сав, хог хаягдал зөөх, тээвэрлэлт;
• Инженерийн шугам сүлжээний онгорхой таг, гадаргын ус зайлуулах сүлжээ, трапп, хоолой;
• Авто замын байгууламж, хашлага, явган хүний замын эвдрэл;
• Оршин суух бүсэд газрын зориулалтыг зөрчиж, хоёрдогч түүхий эд, төмөр цуглуулах цэг;
• Суурьшлын бүсэд байрлах шатахуун түгээх станц;
• Суурьшлын бүсэд байрлах хайрга, дайрга олборлох, барилгын материал үйлдвэрлэл, бетон зуурмагийн үйлдвэр;
• Гудамж, зам талбайд үүссэн хур хог хаягдал, бохирдсон нийтийн эзэмшлийн эд хөрөнгө;
• Төрийн болон үйлчилгээний байгууллагуудын гадна орчны стандарт;
• Хөгжлийн бэрхшээлтэй иргэний хүртээмжтэй төлөвлөлт;
• Гадна фасад, засвар үйлчилгээ;
• Хотхон, хороолол, нийтийн эзэмшлийн зам талбайн ногоон байгууламж зэргийн зөрчлийг арилгаж, иргэд таатай, аюулгүй, чөлөөтэй зорчих нөхцөлийг бүрдүүлэх аж.