Н.Учрал: 1xbet, Melbet гэх мэт цахим мөрийтэй тоглоомыг тоглох, зохион байгуулах, зуучлах, сурталчилбал эрүүгийн хариуцлага хүлээлгэнэ

Гэрэл зургийг MPA агентлагийн онцгой зөвшөөрөлтэйгөөр ашиглав

Засгийн газрын өчигдрийн хуралдаанаар мөрийтэй тоглоом, бооцоот тааврын асуудлыг хэлэлцэж, холбогдох хуулийн төслийг Улсын Их Хурал(УИХ)-д яаралтай горимоор өргөн мэдүүлэхээр тогтсон билээ. 

Үүнтэй холбогдуулан Засгийн Газрын Хэрэг Эрхлэх Газар(ЗГХЭГ)-ын дарга Н.Учрал энэ төрлийн харилцааг хуулийн төсөлд хэрхэн зохицуулах талаар өөрийн цахим хуудсаараа дамжуулан мэдээлэл өглөө. 

Тэрбээр "Иргэн, аж ахуйн нэгж, influencer, youtuber-үүд, ТВ, Фм радио, Youtube, Facebook, Instagram, Tik tok гэх мэт олон нийтийн сувгаар 1xbet, Melbet болон бусад цахим мөрийтэй тоглоомыг сурталчилсан тохиолдолд эрүүгийн хариуцлага хүлээнэ.

Манай улсын хувьд зөвхөн 1xbet гэхэд жилдээ нэг сая ам.доллароор спортын баг, дуучид, influencer, youtuber-үүдийг ивээн тэтгэж 500 сая ам.долларын ашиг олдог гэсэн тооцоо бий. Энэ 500 сая доллар бол Монгол залуусын ажил, амьдрал, үр хүүхэд, хайртай бүхнээсээ хагацан байж өгсөн мөнгө. Сүүлдээ бараг айл бүр 1 мөрийтэй тоглоомчин, казиночин, бэтчинтэй болжээ.

Тийм учраас Монгол Улсын Засгийн газраас 1xbet, Melbet гэх мэт төрөл бүрийн цахим мөрийтэй тоглоомыг тоглосон, зохион байгуулсан, зуучилсан, сурталчилсан бүх үйлдэлд эрүүгийн хариуцлага хүлээлгэх хуулийг нэн яаралтай горимоор УИХ-д өргөн мэдүүлэхээр шийдвэрлэсэн юм.

Цахим мөрийтэй тоглоомыг сурталчлахыг хориглосон жишээ

1. ОХУ: 1XBET-ийг албан ёсоор хааж, сурталчилгаа явуулсан хүмүүсийг шийтгэсэн. Оросын эрх баригчид 1XBET-ийг хууль бус үйл ажиллагаа явуулсан хэмээн 2022 онд албан ёсоор хориглож, уг платформыг сурталчилсан олон нийтийн сүлжээний нөлөөлөгчдийг их хэмжээний торгууль, зарим тохиолдолд эрүүгийн хариуцлагад татсан.

2. Франц: Цахим мөрийтэй тоглоомын сурталчилгаанд хязгаарлалт тогтоосон. Францын Засгийн газар цахим мөрийтэй тоглоомын сурталчилгааг телевиз, радио, олон нийтийн сүлжээгээр явуулахыг эрс багасгаж, зөвхөн тодорхой насны хүмүүсийн хандаж болох платформуудад зөвшөөрдөг болсон.

3. БНХАУ: Онлайн мөрийтэй тоглоомыг бүрэн хориглосон. Хятад улс цахим мөрийтэй тоглоомыг бүрэн хориглож, VPN ашиглан тоглож буй хүмүүсийг ч илрүүлж, хатуу хариуцлага хүлээлгэдэг. Tencent зэрэг томоохон технологийн компаниудыг мөрийтэй тоглоомын платформуудтай хамтрахыг бүрэн хориглосон байна" гэв.