Х.Нямбаатар: Эмнэлгийн зөвшөөрлийг шинээр олгоход авлига авдаг ялзарсан хэдэн түшмэл НЭМГ-т байна гэсэн гомдол ирсэн
Нийслэлийн засаг даргын хэрэгжүүлэгч агентлаг Нийслэлийн Эрүүл мэндийн Газарт авлига, хүнд суртал байгаа талаар иргэд, ААН-үүдээс гомдол ихээр ирж байгааг хотын дарга Х.Нямбаатар мэдээлэв.
Тэрбээр "Нийслэлийн Эрүүл мэндийн Газартай холбоотой олон тооны гомдол ирж байна. Эмнэлгийн зөвшөөрөл сунгах болон олгоход мөнгө авдаг бүтэн армитай болчихсон юм байна. Тус газарт санхүүгийн шалгалт оруулна. Өргөдөл гомдлуудыг би өөрөө хүлээж авч хуулийн байгууллагаар шалгуулах болно.
Нийслэлийн Эрүүл мэндийн Газар дунд шатанд байгаа авлигын сонгодог жишээ гэдгийг олон иргэнээс ирсэн гомдол харуулж байна.
Эмнэлгүүдэд хуваарилагдаж байгаа тоног төхөөрөмжийг НЭМГ өөрөө худалдан авалтыг хийдэг, чанаргүй зүйл шахдаг, хүнд суртал гаргаж тусгай зөвшөөрлүүдийг шинээр олгоход авлига авдаг ялзарсан хэдэн түшмэд тус газарт байна гэсэн гомдол ирж байна.
Тус газарт өргөн бүрэлдэхүүнтэй дотоод аудитын шалгалт хийж, холбогдох албан тушаалтнуудыг түдгэлзүүлж хуулийн байгууллагад шилжүүлнэ.
НЭМГ-ын зарим нэр бүхий хүнийг өөрөө өргөдлөө өгөөсэй гэж бодож байна. Өргөдлөө өгөхгүй бол удаан хугацаанд шалгагдаж, гэм буруугийн олон асуудал хуулийн байгууллагад яригдах байх. Тэдний оронд шижигнэсэн залууст зориулсан нээлттэй сонгон шалгаруулалт зарлаж, цэгцэлнэ" гэв.
Өнгөрсөн сард НЭМГ-ын дарга П.Эрхэмбулганыг чөлөөлж, Х.Бат-Ирээдүйг томилжээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
