Гэрэл зургийг MPA агентлагийн онцгой зөвшөөрөлтэйгөөр ашиглав

Засгийн газрын өнөөдрийн хуралдаанаар "Шинэ Хархорум" хотын захирагчаар Зам, тээврийн хөгжлийн сайд асан Л.Халтарыг томилох шийдвэр гаргажээ.  

Л.Халтар нь Төмөр замын ашиглалтын инженер, бизнесийн менежер мэргэжилтэй. ОХУ-ын Санкт-Петербург хотын Төмөр замын сургууль, ОХУ-ын Эрхүү хотын Замын харилцааны их сургуульд тус тус суралцаж, төгссөн. Улаанбаатар төмөр замын орлогч даргаар ажиллаж байгаад Зам, тээврийн хөгжлийн дэд сайд болон сайдын албыг хашиж байв.

Нэмж дурдахад түүний толгойлон ажиллах гэж буй “Шинэ Хархорум” хотын ерөнхий төлөвлөлтийг соёл, аялал жуулчлал, өндөр технологийн үйлдвэрлэлийн төв болгон байгаль орчинд ээлтэй, ногоон хөгжилд тулгуурласан, ухаалаг, эко хот байхаар хийж буй. Нийтдээ 189,363 га талбай бүхий тус хот 500,000 хүн амтай байх бөгөөд суурьшлын бүсийн 50 хувь нь ногоон байгууламж байх юм. 

Л.Халтарын намтар: 

Л.Халтар нь1965 онд Ховд аймгийн Дарви суманд төрсөн.

Боловсрол:

• 1983 онд Улаанбаатар хотын 28 дугаар дунд сургууль
• 1990 онд ОХУ-ын Санктпетербург хотын Төмөр замын дээд сургууль
• 1999 онд ОХУ-ын Санктпетербург хотын Зам харилцааны их сургуулийг тус тус төгссөн. Инженер мэргэжилтэй, докторын зэрэгтэй.

Ажилласан байдал:

• 1983 онд “Улаанбаатар төмөр зам” хувь нийлүүлсэн нийгэмлэгийн Захиргааны хэлтэст цэвэрлэгч
• 1983-1985 онд мөн хувь нийлүүлсэн нийгэмлэгийн Худалдааны баазад ачигч
• 1990-1992 онд “УБТЗ” ХНН-ийн Төмөр замын коллежид багш
• 1992-1993 онд “УБТЗ” ХНН-ийн Ачиж, буулгах ангийн орлогч дарга
• 1993-2006 онд “УБТЗ” ХНН-ийн Тээвэр зуучийн төвд захирал
• 2006-2018 онд “УБТЗ” ХНН-ийн Удирдах газарт орлогч дарга
• 2018-2020 онд Зам, тээврийн хөгжлийн Дэд сайд
• 2020-2022 онд Зам, тээврийн хөгжлийн сайдаар ажиллаж байв.