Өмнөд Солонгос улс өндөр технологийн гадаад мэргэжилтнүүдэд зориулсан “топ ангиллын виз” нэвтрүүлэхээр болжээ

Өмнөд Солонгосын ерөнхийлөгчийн үүрэг гүйцэтгэгч бөгөөд сангийн сайд Чой Сан Мок

Өмнөд Солонгосын засгийн газар өндөр технологийн салбарын гадаад мэргэжилтнүүдийг татах зорилгоор визийн шинэ ангиллыг нэвтрүүлэхээр болсноо өчигдөр зарлажээ.

“Топ ангиллын виз” гэж нэрлэсэн F-2 ангиллын визийг хиймэл оюун, квантын тооцоолуур, цахилгаан автомашины батарей, хагас дамжуулагч зэрэг өндөр технологийн салбарт хамгийн багадаа найман жил ажилласан туршлагатай гадаадын мэргэжилтнүүдэд олгох юм байна.

Ийм виз авсан мэргэжилтнүүд гэр бүлийн хамт Өмнөд Солонгост гурван жил ажиллаж, амьдарсны дараа байнга оршин суух эрх авах боломжтой болох гэнэ.

“Хүн ам зүй болон эдийн засгийн өөрчлөлтөд дасан зохицохын тулд гадаадын мэргэжилтнүүдийг татах нь сонголт биш, зайлшгүй шаардлага болоод байна. Бид дэлхийн жишигт нийцсэн өндөр технологитой улсынхаа хувьд гадаадын чадварлаг мэргэжилтнүүдийн өсөж дэвжих, суурьших хамгийн таатай орчныг бүрдүүлэх ёстой” гэж тус улсын ерөнхийлөгчийн үүрэг гүйцэтгэгч бөгөөд сангийн сайд Чой Сан Мок өчигдөр Сөүл хотод засгийн газрын байранд болсон уулзалтын үеэр хэлжээ.

Виз горилогчдод тавих шаардлагад дэлхийн шилдэг 100 их сургуулийн нэгийг төгссөн байх, дэлхийн шилдэг 500 компанийн нэгд гурваас доошгүй жил ажилласан байх зэрэг нөхцөлүүдийг бас нэмсэн байна.

Ийм мэргэжилтнүүдийн цалингийн доод хэмжээг Өмнөд Солонгосын нэг хүнд оногдох дотоодын нийт бүтээгдэхүүний хэмжээнээс гурав дахин өндөр байхаар (жилийн 140 сая вон буюу $96,000 орчим) тогтоожээ.

Үүнээс гадна Өмнөд Солонгосын шилдэг их сургуулиудад байгалийн ухааны мэргэжил эзэмшсэн гадаадын оюутнуудад төгссөнөөсөө хойш хоёр жил хүртэл хугацаанд ажлын байр хайх боломж олгодог D-10 ангиллын визийг гаргахаар төлөвлөж байгаа юм байна.

Энэхүү визийг горилогчдод тавигдах шаардлагыг ойрын өдрүүдэд зарлахаар төлөвлөжээ.

Эх сурвалж: Korea Times