Япон улсын засгийн газар Монгол улсад 545 сая иений тусламж үзүүлэхээр болжээ

Япон улсын засгийн газар Монголын дэд бүтцийг сайжруулахад зориулан 545 сая иений ($3.66 сая) тусламж үзүүлэхээр болсноо өчигдөр зарлажээ.

Тус улсын гадаад хэргийн сайд Такеши Иваяа, Монгол улсын гадаад хэргийн сайд Б.Батцэцэг нар Токио хотод уулзахдаа энэхүү тусламжийн баримт бичигт гарын үсэг зурсан юм байна.

Сайд нар бас 1970-1980-аад оны үед Умард Солонгост хулгайлагдсан Японы иргэдийн асуудлаар хамтын ажиллагаагаа үргэлжлүүлэхээр тохиролцжээ.

“Япон, Монгол хоёр улс энх тайван, хөгжил цэцэглэлтийн төлөө нэгдмэл зорилготой стратегийн онцгой түншүүдийн хувьд хамтын ажиллагаагаа эрчимжүүлэх нь улам бүр чухал болж байна” гэж Иваяа сайд энэ үеэр хэлсэн байна.

Япон улстай харилцаагаа хөгжүүлэх нь Монголын гадаад бодлогын нэн тэргүүний зорилтуудын нэг болохыг Батцэцэг сайд мөн онцолжээ.

Энэ удаагийн тусламжийн 275 сая иенийг агаарын бохирдлыг хянах тоног төхөөрөмжүүдэд, 270 сая иенийг цэвэрлэх байгууламжийн тоног төхөөрөмжүүдэд зориулах юм байна.

Саяхан Япон улсын засгийн газар 2023 оноос хэрэгжүүлж эхэлсэн “Аюулгүй байдлын албан ёсны тусламж” хөтөлбөрийнхөө хүрээнд Монголын зэвсэгт хүчинд 1.3 тэрбум иений үнэ бүхий агаарын хөдөлгөөний удирдлагын радарын систем тусламжаар нийлүүлэх шийдвэр гаргасан билээ.

БНАСАУ-тай найрсаг харилцаатай Монгол улс өмнө нь Японы хулгайлагдсан иргэдийн асуудлаар яриа хэлэлцээнд Токио, Пёняны хооронд зуучлах үүрэг гүйцэтгэж байсан юм.

Эх сурвалж: Kyodo News