Н.Учрал: Цахим мөрийтэй тоглоомын сайтуудыг шалгах Ажлын хэсэг байгуулагдана

Гэрэл зургийг MPA агентлагийн онцгой зөвшөөрөлтэйгөөр ашиглав

Засгийн газрын Хэрэг эрхлэх газрын (ЗГХЭГ)-ын дарга Н.Учрал өөрийн цахим хуудсаараа дамжуулан гаднын цахим тоглоомын сайтуудыг шалгах Ажлын хэсэг байгуулагдаж байгааг мэдээлэв.

Тэрбээр "1XBET-ээр дамжин нэг орчим их наяд төгрөг ямар нэгэн татвар, шалгалтгүй гадагшаа урсжээ. Олон айлын амьдралыг үрэн таран хийж буй “зөвшөөрөлгүй” цахим мөрийтэй тоглоомыг шалгах ажлын хэсэг байгууллаа" гэсэн юм.

Ташрамд Нийслэлийн гэмт хэргээс урьдчилан сэргийлэх ажлын зохицуулах салбар зөвлөлөөс цаг үеийн асуудлаар өнгөрсөн нэгдүгээр сард мэдээлэл өгөх үеэр Нийслэлийн Иргэдийн Төлөөлөгчдийн Хурал (НИТХ)-ын дарга А.Баяр "Сүүлийн үед залуучууд цахим мөрийтэй тоглоомд илүү их донтож эхэлсэн. 200 сая ам.долларыг манай залуучууд цахим мөрийтэй тоглоомд гадагш алдсан байна. Энэ нь Үндэсний аюулгүй байдлын түвшинд, тухайн гэр бүл, донтсон залуусын ажил амьдралд, Монгол Улсын хөгжилд саад тотгор болж байгаа учраас цахим мөрийтэй тоглоомын эсрэг ажиллана" гэж онцолж байв.