Ж.Батзандан: Стратегийн ордуудын талаарх дүгнэлтээ ҮАБЗ, Хууль зүйн сайд надад өгөх ёстой. Ингэж байж би хэлцэл хийх эсэхээ шийднэ

Гэрэл зургийг MPA агентлагийн онцгой зөвшөөрөлтэйгөөр ашиглав

Засгийн газрын Бүрэн Эрхт Төлөөлөгч Ж.Батзандан мэдээлэл хийлээ.

Тэрбээр “Стратегийн ордуудад дээр нүүрлэсэн хулгай луйвар, бузар булайтай тэмц гэж намайг Монгол Улсын Засгийн газрын БЭТ-ээр томиллоо. Зүгээр л бузар булайг нь илчил гэж. Тэгээд Баялгийн сандаа орлого төвлөрүүл гэж.

Миний бие ажил гардаж авсан бол тултал нь хийдэг хүн.

Стратегийн нийт 55 орд байгаа. Гэтэл өнөөдөр стратегийн ордуудыг хулгайлаад, идээд уугаад дуусаж байна. Сүхбаатарын Цайрт менерал, Бороо гоулд, Оюутолгой гэх мэтчилэн.  

Монголын ард түмнийг 34 жил зальдсан уул уурхайн луйврыг ил зарлахгүй бол Засгийн газрын БЭТ гэж байх хэрэггүй. БЭТ гэдэг бол онцгой нөхцөл байдал үүссэн үед томилогддог албан тушаал. Одоо онцгой нөхцөл байдал үүссэн байна.

Стратегийн ордоос 9-ийг нь хувийн компаниудад 1997-2005 оны хооронд шилжүүлсэн нөхрийг одоо зарлана. Тэр бол 1997-2004 оны хооронд Ашигт малтмалын газрын даргаас ажиллаж байсан н.Жаргалсайхан. Энэ нөхөр улсын төсвөөр хайгуул хийсэн стратегийн ордуудыг хувийн компаниудад шилжүүлсэн. Энэ хүн одоо өөрөө Цайрт менералаас хувьд эзэмшдэг. Наана байгаа хүмүүс энэ хүний гар хөл болсон хүмүүс. Халзан бүргэтэй гэж стратегийн орд. Гэтэл энэ нөхөр хувийн компанид олгосон. Бороо гоулд, Ухаа худагийг ч энэ хүн хувийн компанид шилжүүлсэн. Энэ хүн өдөөр гурван стратегийн ордын далд эзний үүргийг гүйцэтгэж байгаа.

Хоёрхон сонголт байгаа. Хулгайч нартай хэлцэл хийх үү, хулгайлагдсан ордуудаа буцааж авах уу.

Би Засгийн газар, УИХ-д тодорхой саналууд тавина. Монголын төр хулгайч нартай хэлцэлд орох гэж байгаа бол хулгайг дэмжиж байна гэсэн үг. Би энэ бүх асуудлыг Ерөнхийлөгч, Ерөнхий сайд болон Үндэсний Аюулгүй Байдлын Зөвлөлд тавина. Стратегийн аль орд нь хуулийн дагуу, аль нь хулгай луйврын замаар очсон бэ гэдгийг ҮАБЗ, Засгийн газар, Хууль зүйн сайд дүгнээд надад өгөх ёстой. Ингэж байж би энэ хүмүүстэй хэлцэл хийх үү үгүй юу гэдгээ шийднэ.

Ж.Батзанданг БЭТ-өөр томиллоо гэж бүх хэвлэл мэдээллээр муулж байна. Ж.Батзандангаас өөр хүн байсан бол та нарт сайхан байх байсан биз.

Хөшөөтийн уурхайд луйвар хийгээд байгаа нөхдөд хэлье. Удахгүй уурхайг чинь стратегийн ордод бүртгэж авна. Тэр луйврыг зохион байгуулсан хүн нь талийгаач болсон, сайд байсан хүн. Стратегийн орд болгон ард нэг сайд, гурван УИХ-ын гишүүн байна. Энэ завхралыг одоо зогсооно.

Өчигдөр Засгийн газрын хуралдаан дээр Ерөнхий сайд сайд нартаа маш тодорхой чиглэл өгсөн. Баялгийн хулгай зогсоож, ашгийг нь ард түмэнд өгөхгүй бол хувьсгал гарна шүү гэсэн.

Эрдэнэтийн уурхайн хажууд үүсмэл орд ашигладаг гурван орд бий. Нэгийг нь П.Цагаан дарга болон Эбэ нар эзэмшдэг. Одоо П.Цагаан дарга гадагшаа гараад явчихсан. Би Засгийн газрын БЭТ-ийн хувиар П.Цагаан даргыг монголдоо ирж хэлэлцээр хий гэж урьж байгаа. Өөрөө ч хэлэлцээр хийхэд бэлэн байгаагаа илэрхийлсэн.

Хэрэв П.Цагаан тэрхүү үүсмэл ордыг хулгайн замаар авсан гэж үзвэл хэлэлцээр хийхгүй. Шууд лицензийг нь цуцлаад дараагийн компанид өгнө.

Хоёр дахь нь “Зэс эрдэнийн хувь” гэдэг компани. Энэ бол харьцангуй эрүүл компани. 27 хувь нь иргэдэд очсон. Гэхдээ энэ компанийн ард хоёр гишүүн байгаа. Дүүгээ захирлаар нь тавьчихсан. Тэр хоёр гишүүнтэй яриад байх юм байхгүй. Стратегийн ордыг эзэмшиж байгаа бол хурдан хэлэлцээрээ хий гэж дүүдээ хэлээрэй.

Гурав дахь нь “Эрдмин” гэдэг компани. 97 оны үед захирлаар нь ажиллаж байсан хүний хүүхдүүд хариуцдаг. Манай нэг ерөнхийлөгчийн найзын хүүхдүүд эзэмшдэг.

Энэ гурван орд бол албан тушаалаа ашиглаж стратегийн ордыг эзэмшдэг хэдэн дарга нарын үйлдвэр.

Засгийн газрын БЭТ амаргүй ажил хүлээж авсан. Эрх мэдлээрээ далимдуулж монголын ард түмний баялгийг дээрэмдсэн хүмүүс хэвлэлд мөнгө өгөөд Батзанданг муу хэл гэдэг ажлыг өдөр болгон зохион байгуулж байгаа. Би тэднээс айдаг хүн биш.

Энэ гурван ордтой холбоотой хэлэлцээр удахгүй эхэлнэ" хэмээн ярилаа.