Н.Учрал: 1,072 хувьцааны ногдол ашгийг улирал тутам олгодог болох саналыг Эрдэнэс Тавантолгой компанийн ТУЗ-д гаргасан

Гэрэл зургийг MPA агентлагийн онцгой зөвшөөрөлтэйгөөр ашиглав

Засгийн газрын ээлжит хуралдаанаар “Эрдэнэс Тавантолгой” ХК-ийн ногдол ашиг олгох асуудлыг хэлэлцсэн.

Энэ талаар ЗГХЭГ-ын дарга Н.Учрал “Засгийн газрын өнөөдрийн хуралдаанд Эрдэнэс Монгол, Эрдэнэс Тавантолгой компаниудын удирдлага болон ТУЗ-ийн танилцуулгыг сонссон. Засгийн газар Эрдэнэс Тавантолгой компанийн хувьцаа эзэмшигчийн хувиар тодорхой байр сууриа илэрхийлж байгаа. Эцсийн шийдвэрийг Эрдэнэс Тавантолгой компанийн ТУЗ гаргана.

Оны өмнө ногдол ашгийг урьдчилгаа хэлбэрээр иргэдэд олгосон. Одоо бол Эрдэнэс Тавантолгой компанийн 1,072 ширхэг хувьцаа эзэмшиж байгаа иргэдэд улирал тутам шашлалтай хуваарилах нь илүү оновчтой гэж үзэж байгаа. Ингэх нь төлбөрийн тэнцэлд сөргөөр нөлөөлөхгүй, инфляцыг өдөөхгүй байх ач холбогдолтой.

Эрдэнэс Тавантолгой компанийн хувьцааны 27 орчим хувийг иргэд эзэмшдэг.

Засгийн газар хувьцаа эзэмшигчийн хувиар ногдол ашгийг улирал тутам олгодог болох саналыг Эрдэнэс Тавантолгой компанийн ТУЗ-д гаргаж байгаа.

2024 оны ногдол ашиг болох 350 мянган төгрөгийг хувьцаа эзэмшиг иргэдэд олгох боломжтой болсон. Оны өмнө буюу арванхоёрдугаар сард эхний хэсэг болох 130 мянган төгрөгийг олгосон. Үлдсэн 200 мянган төгрөгийн эхний 100 мянгыг цагаан сарын өмнө, үлдсэнийг нь дараагийн улиралд олгох нь зөв гэж үзэж байгаа.

Мөн өнөөдрөөс эхлэн И монголиа-д асуулга нэвтрүүлсэн. 1,072 хувьцааны ногдол ашгаа бэлэн мөнгөөр авах уу, хуримтлалын данс руугаа хийх үү гэдэг санал асуулга гарч ирнэ. Иргэн та өөрөө сонголтоо хийж болно.

Иргэд ногдол ашгаа бэлнээр авахгүй хадгаламж руугаа хийгээд тэр нь цаашлаад үнэт цаас, бонд авах, арилжаалах бололцоо бүрдүүлнэ. Хадгаламж руугаа хийх сонголтыг илүү өгч байвал хаврын чуулганаар Үндэсний баялгийн сангийн тухай хуульд өөрчлөлт оруулж, хадгаламж руугаа ногдол ашгаа авах, түүнийгээ хөрөнгийн зах зээл рүү оруулах боломжийг нээж өгнө.

Хэрэв санал асуулгад оролцоогүй бол ногдол ашгийн мөнгийг шууд данс руу тань шилжүүлнэ" гэлээ.