"Худалдаа эрхлэх зөвшөөрөл өгдөг дарга нар гаднын сүлжээ дэлгүүрийн санхүүжилтээр гадаад улс руу аялаад ирж байгааг шалгуулах хүсэлтэй байна"

Гэрэл зургийг MPA агентлагийн онцгой зөвшөөрөлтэйгөөр ашиглав

ТҮЦ ажиллуулдаг иргэд Үндэсний мэдээллийн төвд өнөөдөр хэвлэлийн хурал зохион байгууллаа.

Тэд төрийн эрх бүхий албан хаагчид CU компанийн зардлаар БНСУ руу аялсан гэх асуудлаар ерөнхий сайд Л.Оюун-Эрдэнэ, хотын дарга Х.Нямбаатар нарт шаардлага хүргүүлж, нэр бүхий 15 албан хаагчдыг Авлигатай Тэмцэх Газар (АТГ)-аар шалгуулахаа мэдэгдсэн юм.

Энэ талаар “ТҮЦ-ээр амь зуугчдын холбоо” төрийн бус байгууллагын Удирдах зөвлөлийн гишүүн З.Пунсалдулам "Бид ТҮЦ эрхлэгчдийнхээ эрх ашгийг хамгаалж, сүүлийн найман жил гаруй тэмцэж байна. Энэ хугацаанд бид хэзээ ч авлига, албан тушаалын хэрэгт холбоотой асуудлаар хөөцөлдөж байгаагүй.

Гэтэл өнөөдөр хотоор дүүрэн CU, GS25 гэх мэт гадаадын сүлжээ дэлгүүрүүд орж ирснээс хойш жижиг дунд худалдаа эрхэлж буй монгол иргэдийн ажлын байрыг булаалаа.

Бид CU-д ажилладаг дарга нараас нь мэдээлэл олж аваад энэ сарын 11-нд БНСУ руу явахад нь онгоцны буудал дээр очиж явсан хүмүүсийг дүрсжүүлсэн. Мөн өнгөрсөн Ням гарагт ирэхэд нь бас угтаж авсан. 

Нийслэлийн хүнс хөдөө аж ахуйн газрын,хяналтын хэлтсийн дарга болон есөн дүүргийн хүнс худалдаа үйлчилгээний дарга нар явсан хэрнээ гадаадад очсон шалтгаанаа "туршлага судлахаар явсан" гэж тайлбарлаад байгаа.

Сард хоёр сая гаруй төгрөгийн цалинтай төрийн албан хаагч нар хувийн зардлаараа тэнд очиж туршлага судална гэж байхгүй. 

Бидний авсан мэдээллээр CU зардлын гаргаад урилгыг нь БНСУ талаас өгсөн. Нийт найм хоног төсвийн мөнгө, төрийн ажлыг үнэгүйдүүлээд ирсэн.

Гадаадын хөрөнгө оруулалттай сүлжээ дэлгүүрийг дэмжиж болохгүй. Анх худалдаа үйлчилгээний журамд оруулахдаа ая тухтай дэлгүүр гэж онцолсон байдаг. Гэхдээ өнөөдөр ийм байж чадаж байгаа юу. Бие засах гэхээр 00 нь ажиллахгүй гээд бичиг наачихдаг. Одоо бүгд шахам архичдын оромж болсныг иргэд ярьж байгаа. 

Хэл ам, хэрүүл тэмцэл болохоор явсан албан хаагчид нь өөрсдийнхөө зардлаар явсан гэж тайлбарлаж байна. Есөн дүүргийн худалдаа эрхлэх зөвшөөрөл өгдөг дарга нар гаднын сүлжээ дэлгүүрийн санхүүжилтээр гадаад улс руу аялаад ирж байгааг шалгуулах хүсэлтэй байна" гэж ярилаа.