Ц.Баатархүү: Энэ онд орон даяар 5G сүлжээг нэвтрүүлж, сумдын интернэтийн хүчин чадлыг 10 дахин нэмэгдүүлнэ
Цахим хөгжил, инновац, харилцаа холбооны сайд Ц.Баатархүү хийж хэрэгжүүлж буй ажлуудынхаа талаар өнөөдөр мэдээлэл өглөө.
Монгол Улс цаашид баримтлах хиймэл оюуны тухай бодлогоо тодорхойлох үүднээс тус салбарын бүх судлаачдыг оролцуулсан хурал, хэлэлцүүлгүүдийг хийж байгаа юм байна. Үүний дараа Засгийн газраар хиймэл оюуны үндэсний стратегийг батлах аж.
Мөн ЦХИХХЯ-наас 2025 онд орон даяар 5G сүлжээг нэвтрүүлэх бэлтгэл ажлыг хангаад байгаа юм байна. Аж үйлдвэрийн салбарт жолоочгүй тээврийн хэрэгсэл, автоматжуулалт, робот технологиуд 5G нэвтрэхгүй бол хэрэглэгдэх боломжгүй. 5G нэвтрүүлэхгүй бол хөдөө хотын ялгаатай байдал хэвээр байсаар байна гэдгийг ЦХИХХ-ны сайд Ц.Баатархүү онцлов.
Манай улс 52,480км шилэн кабелтай ба нийт нутаг дэвсгэрийн 23 орчим хувьд интернэтийн үйлчилгээ очсон байдаг байна. Энэ жил сумдын интернэтийн хүчин чадлыг 2025 онд 10 дахин нэмэгдүүлнэ.
Түүнчлэн 5G нэвтэрч эд зүйлсийн интернэт бий болсноор айлуудын цахилгаан, усны тоолуур нь автомат болж, үнэн зөв тооцоолол хийнэ. Хүн очиж бичих шаардлагагүй болно гэв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
