С.Эрдэнэбат: Таваас дээш орон сууцтай, асар үнэтэй объект эзэмшдэг хүмүүсийн түрээсийн орлогоос татвар авах ёстой

Гэрэл зургийг MPA агентлагийн онцгой зөвшөөрөлтэйгөөр ашиглав

Татварын багц хуулийн шинэчлэлтэй холбогдуулан Монголын Үйлдвэрчний Эвлэлийн Холбоо (МҮЭХ) өнөөдөр хэлэлцүүлэг зохион байгууллаа. 

Ирэх хаврын чуулганаар татварын багц хуулийн шинэчлэлийг хэлэлцэхээр байгаа учраас үйлдвэрчний эвлэлийн байгууллага тус хуулийн төсөлд өгөх саналаа өнөөдөр хэлэлцэж байгаа юм. Үүнтэй холбогдуулан УИХ-ын гишүүн, МҮЭХ-ны ерөнхийлөгч асан С.Эрдэнэбат ямар саналууд өгөх гэж буй талаараа мэдээлэл өглөө. 

Тэрбээр "УИХ-ын намрын ээлжит чуулганы хэлэлцэх асуудлын дараалалд татвар болон нийгмийн даатгалын тухай хуулийн шинэчлэл багтаж байсан. Татварын тухай хуульд цалингаас цалингийн хооронд ажилладаг, бага дунд орлоготой иргэдэд хөнгөлөлт үзүүлэх санал дэвшүүлж байгаа.

Мөн иргэдийн цалинтай нь хамааруулж бага орлоготой бол татвараас бүр мөсөн чөлөөлөх хэрэгтэй байна. Иймэрхүү жишиг олон улсад байдаг. Тухайлбал өрхийн нэг гишүүний ногдож буй орлого амьжиргааны баталгаажих доод түвшин юм уу, хөдөлмөрийн хөлсний доод хэмжээнээс бага байвал ямар ч татвар авдаггүй. Ер нь 1.5 сая төгрөгөөс доош хэмжээний цалинтай иргэд ардаа гурван хүүхэд тэжээж байвал огт татвар авдаггүй байх хэрэгтэй. 

Ажилчдадаа хоол унааны мөнгө өгдөг аж ахуйн нэгж байгууллагаас татвар, нийгмийн даатгал, НӨАТ гэсэн татварыг давхардуулж авах бодлого хэрэгжээд байна. Үүнийг өмнөх татварын хуульд хөнгөлөх гээд чадаагүй. Хүмүүс татвараас зугтааж хоол унааныхаа мөнгөнд сардаа 5-10 сая төгрөг өгөөд байвал яах вэ гэж тайлбарлаж байлаа. Өдөрт 15-20 орчим мянган төгрөгийн хоол унааны мөнгөнөөс ямар ч татвар авахгүй гэх саналыг би оруулна. 

 

Гэрэл зургийг MPA агентлагийн онцгой зөвшөөрөлтэйгөөр ашиглав

Сургалтын төлбөр дээр сонирхолтой санал орж ирсэн. Тухайлбал англи хэлийг гуравдугаар ангиас нь үнэ төлбөргүй заахаар хуульчилсан. Манай орны хэмжээнд 100 гаруй улсын сургууль англи хэлийг гуравдугаар ангиас нь заах боломжтой гэсэн судалгаа бий. Гэтэл ихэнх эцэг эхчүүд хүүхдүүдээ англи хэлний төлбөртэй сургалтад явуулж байгаа бол татвараас хөнгөлөх санал оруулж өгье. Төр нийт иргэнд суурь боловсролыг үнэ төлбөргүй олгоно гэж Үндсэн хуульдаа заасан. Жирийн айлын хүүхэд гуравдугаар ангиасаа англи хэлийг мэргэжлийн багшаар заалгуулах эрхтэй. Үүнийг төр нь хийж чадахгүй бол татвараас чөлөөлөх хэрэгтэй. 

 

Гэрэл зургийг MPA агентлагийн онцгой зөвшөөрөлтэйгөөр ашиглав

Тухайн аж ахуйн нэгж байгууллага ажилтныхаа хүүхдэд сургалтын төлбөрийн дэмжлэг үзүүлсэн тохиолдолд нэг хувийн татварын хөнгөлөлтөд хамруулахгүй гэж байна. Хамгийн түрүүнд аж ахуйн нэгж байгууллага ажилтныхаа хүүхдэд гадаад дотоодод сурахад дэмжлэг үзүүлбэл нэг хувийн татварын хөнгөлөлтөд хамруулах санал гаргана.

Орон сууцны түрээсийн орлогоос татвар авна гэж байгаа нь буруу. Тухайлбал нэг хүн өөрийнхөө амьдардаг байраа амьдрахгүй байх хугацаандаа түрээсэлчихдэг. Үүнээс нь татвар авах буруу.

Харин таваас дээш орон сууцтай, асар үнэтэй объектыг эзэмшдэг хүмүүс түрээсийн орлогоосоо татвар төлдөггүй. Ийм хүмүүсийн түрээсийн орлогоос татвар авах ёстой. Орон сууцны үнэ асар өндөр байгаа. Хүмүүс орон сууц худалдаж авна гэдэг мөрөөдөл болсон.

Бохир мөнгө эргэлдүүлж угаахын тулд үл хөдлөх хөрөнгийн зах зээл рүү оруулдаг. Үүнээс болж орон сууцны үнэ хөөрөгдөж байгаа. Залуус яаж цалингаараа байранд орж чадах билээ. Тиймээс аж ахуйн нэгжүүд ажилчдаа орон сууцаар дэмжсэн байвал татвараар дэмжих ёстой. Хэт олон орон сууцтай, түрээсийн орлоготой хүмүүсээс татвар авах ёстой" хэмээн ярилаа.