Газын зурвасыг эзлэх Трампын санааг Цагаан ордноос залрууллаа

Мягмар гарагт Израилийн ерөнхий сайдтай Цагаан ордонд уулзсаныхаа дараа АНУ-ын ерөнхийлөгч Дональд Трамп газар нутгаа тэлэх бас нэг санаа гаргаж, дэлхий нийтийг алмайруулсан юм.

Ингэхдээ тэр Газын зурвасыг АНУ-ын эзэмшилд авах, тэнд амьдардаг палестинчуудыг хөрш Арабын орнуудад бүрмөсөн шилжүүлэх тухай ярьж байв.

Тэгвэл маргааш нь АНУ-ын засаг захиргааныхан Трампын илэрхийлсэн санааг засаж залруулах арга хэмжээ авч эхэлжээ.

Өчигдөр Цагаан ордны хэвлэлийн төлөөлөгч Каролин Ливитт ерөнхийлөгч нь палестинчуудыг Газын зурвасаас бүр мөсөн биш, түр зуур нүүлгэн шилжүүлэх тухай ярьсан, Газын зурвасыг сэргээн босгох зардлыг АНУ төлөхгүй, АНУ-ын цэргүүд Газын зурваст хөл тавихгүйг батлан илэрхийлсэн байна.

“Бүс нутгийн тогтвортой байдлыг хангахын тулд АНУ энэхүү сэргээн босголтын хүчин чармайлтад оролцох шаардлагатайг ерөнхийлөгч маш тодорхой хэлсэн” гэж тэр энэ үеэр мэдэгджээ.

Гэхдээ энэ нь “Газын зурвасыг эзлэх, Америкийн татвар төлөгчид сэргээн босгох зардлыг гаргана гэсэн үг биш” болохыг Ливитт тайлбарласан байна.

“Египет, Йордан зэрэг бүс нутгийн түншүүд маань Палестины дүрвэгсдийг түр хүлээн авч, орогнуулах, энэ хооронд тэдний орон гэрийг сэргээн босгох тухай ерөнхийлөгч ярьсан. Яг одоо энэ газар балгас болоод байгаа. Тэнд хүн амьдрах ямар ч боломжгүй болсон” гэж тэр хэлжээ.

АНУ-ын цэргийг Газын зурваст оруулах санааг үгүйсгэж байгаа эсэхийг нь лавлахад Ливитт “Ерөнхийлөгч хараахан ийм шийдвэр гаргаагүй байна” гэж хариулсан юм.

Сүүлд АНУ-ын төрийн нарийн бичгийн дарга Марко Рубио дээрх санааг давтан илэрхийлжээ.

Түүний хэлснээр Трампын санаа нь “дайсагнах утга агуулаагүй, харин эсрэгээрээ сэргээн босголтыг хариуцах маш өгөөмөр сэтгэлийн илэрхийлэл” гэнэ.

“Ерөнхийлөгч иргэдийн орон гэр, ажлын байруудыг сэргээн босгож, хүмүүс буцаж ирэх боломжийг бүрдүүлэх хүсэлтэй байгаа” гэж Гватемалд айлчилж байгаа Рубио мэдэгдсэн байна.

Трампын цочирдуулсан байр суурь Палестины засаг захиргааны удирдлагууд, Европ болон Ойрх Дорнодын засгийн газруудын ширүүн эсэргүүцэлтэй тулгарсан юм.

Израилийн засгийн газар болон Палестины Хамас зэвсэгт байгууллагын хооронд гал зогсоох гэрээний “хоёр дахь шат”-ны яриа хэлэлцээ ид үргэлжилж байх цаг үетэй Трампын мэдэгдэл давхцаж байгаа.

Талууд энэ шатанд тохиролцож чадвал Газын зурваст дайн бүр мөсөн зогсож, урт хугацааны энх тайван тогтох зам нээгдэх юм.

Эх сурвалж: AFP