"The MongolZ" баг нэг сая ам.долларын шагналын сантай "IEM Katowice 2025" тэмцээний эхний тоглолтдоо хожлоо
Цахим спортын "Counter Strike 2" тоглоомын дэлхийн аварга шалгаруулах тэмцээний дараа эрэмбэлэгддэг "Intel Extreme Masters Katowice 2025"-ийн хэсгийн шатны тоглолтууд Польш улсад зохион байгуулагдаж байна.
Нийт нэг сая ам.долларын шагналын сантай тус тэмцээнд манай улсын "The MongolZ" баг урилгаар оролцож байгаа юм. Тэд тэмцээнээ В хэсгээс эхлүүлж байгаа бөгөөд эхний тоглолтдоо Нидерландын "Team Liquid" багтай "Во3" (гурван "map"-аар ялагчийг тодруулах) журмаар тоглож, 2:1-ээр хожлоо.
"Team Liquid" багийн сонгосон "Nuke map" дээр манай баг хамгаалах талаасаа эхэлж 6:6-аар байраа сольсон. Үргэлжлүүлэн довтлох талаасаа дөрвөн үе авсан хэдий ч 10:13-аар ялагдал хүлээв.
Харин өөрсдийн сонгосон "Mirage map" дээр довтлох талаасаа эхэлж 8:4-өөр байраа сольсон юм. Тэгвэл хамгаалах талаасаа таван үе авснаар 13:8-аар тус "map" дээр ялалт байгуулсан. Улмаар сүүлийн шийдвэрлэх "Ancient map" дээр манай улсын баг 13:11-ээр хожлоо.
Ийнхүү тэд маргааш 20:30 цагаас Германы "GamerLegion" багтай Playoffs шатанд шалгарах эрхийн төлөө тоглохоор болж байна. "The MongolZ" багийн хувьд дэлхийн чансааны гуравдугаар байрт эрэмбэлэгдэж байгаа учраас энэ тэмцээнд хэсгийн шатанд урилгаар оролцох эрх авсан юм.
"Intel Extreme Masters Katowice 2025" тэмцээнд нийт 24 баг өрсөлдөж байгаа билээ. Урьдчилсан шатанд 16 баг тоглож, найм нь хэсгийн шат руу дэвшсэн. А болон В хэсгийн шатанд шалгарсан 16 багийн тоглолтууд хоёрдугаар сарын 5-н хүртэл явагдана.
Хэсгийн шатанд багууд нэг удаа хожигдох эрхтэй, хоёр хожигдвол тэмцээнээ өндөрлүүлнэ. Харин Playoffs буюу хасагдах шатанд нийт зургаан баг цэнгэлдэх хүрээлэнд үзэгчдийн өмнө шууд хасагдах журмаар тоглоно.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
32 СЭТГЭГДЭЛТЭЙ
|
