Л.Баттөр: Менингококкт халдварын сэжигтэй хоёр тохиолдлын шинжилгээний хариу энэ сарын 4, 6-нд эцэслэгдэж гарна

Гэрэл зургийг MPA агентлагийн онцгой зөвшөөрөлтэйгөөр ашиглав

Эрүүл Мэндийн Яам болон Хавдар Өвчин Судлалын Үндэсний Төв (ХӨСҮТ)-өөс менингококкт халдварын нөхцөл байдлын талаар өнөөдөр мэдээлэл өглөө. 

Эрүүл мэндийн яамны Нийгмийн эрүүл мэндийн бодлогын газрын дарга Л.Баттөр "Өнгөрсөн оны сүүл үед таван сэжигтэй тохиолдол байсан. Үүнд шинжилгээ хийхэд хоёр тохиолдол нь менингококкт халдвартай болох нь батлагдсан бөгөөд эмчлэгдээд бүрэн эдгэрсэн. 

2025 он гарснаас хойш нийт гурван сэжигтэй тохиолдлын нэг нь батлагдсан. Харамсалтай нь өвчин богино хугацаанд хүнд явцтай байсан учраас хүүхэд эндсэн. Хоёр сэжигтэй тохиолдол дээр эмгэг төрөгч илрүүлэх шинжилгээ хийгдэж байна. Нэг сэжигтэй тохиолдол нь Баянгол дүүргээс, нөгөөх нь Баянзүрх дүүрэгт гарсан байгаа. 

Дээрх хоёр тохиолдлын нэг хүүхэд нь арванхоёрдугаар сарын 8-наас буюу хичээл амарснаас хойш хичээлдээ яваагүй. Хичээл эхлэх үед ханиад хүрсэн гэдэг байдлаар гэрээрээ эмчлэгдэж байсан. Нэгдүгээр сарын 31-нд ХӨСҮТ-д хандсан. Зөвхөн гэрийнхэнд нь тандалтын хариу арга хэмжээ авсан. Хичээлдээ яваагүй учраас ангийн хүүхдүүд нь халдвар аваагүй. 

Цахим сүлжээнд өчигдөр шөнө менингококкт халдвартай холбоотой мэдээлэл тавигдсан байна. Мөн зарим хүн хүүхдээ ямар өвчний улмаас эндсэн шалтгааныг тодорхойлохгүйгээр менингококкт халдварын постыг хуваалцаж, өөрийнхөө үзэл бодлыг бичсэн. Үүнээс болж тухайн эндсэн хүүхдийг менингококкт халдварт авсан гэдэг буруу мэдээлэлтэй байна" гэв.