"Хэн гэх албан тушаалтан ямар хууль бус шийдвэр гаргасан, шүүх хэрхэн эцэслэн тогтоосныг харах боломжтой цахим системийг хөгжүүллээ"
Төрийн Албаны Зөвлөлөөс төрийн албаны шинэчилсэн цахим системийг танилцуулах уулзалтыг Татварын Ерөнхий Газарт өнөөдөр зохион байгууллаа.
Тус цахим шинэчлэлтээр төрийн албанд гарч байгаа хууль бус томилгооны мэдэгдэл цахим системд ирж, орон даяар иж бүрэн хянах боломж бүрдэж байгаа аж. Мөн төрийн албан хаагч мэргэжил, шаардлага, ур чадвартаа тохирох сул орон тооны мэдээллийг системээр дамжуулан үзэх, сонголт хийх, шалгалтад орох боломжтой болсон байна.
Энэ талаар Төрийн Албан Зөвлөлийн дарга Л.Цэдэвсүрэн дэлгэрэнгүй танилцуулж, мэдээлэл өглөө.
Тэрбээр "Төрийн албаны тухай хуульд манай улсад үйл ажиллагаа явуулж буй төрийн алба, албан хаагчдын нэгдсэн тоо бүртгэлийг хөтлөх чиг үүрэг нь манай байгууллагад байдаг.
Энэхүү тоо бүртгэлийг Excel суурьтай хийдэг байсныг 2022 оноос цахим руу үе шаттай оруулж эхэлсэн. Улмаар 2024 оноос дээрх мэдээллийг зөвхөн төрийн байгууллага үздэг байсныг dashboard хэлбэрээр иргэд, олон нийт, төрийн албан хаагчид өөрсдөө танилцдаг болж байна. Түүнчлэн төрийн албан хаагч хүн өөрийнхөө тусгай эрхээр нэвтэрч ороод мэдээллээ шалгадаг, хянадаг, засвар оруулдаг системийг хөгжүүлсэн.
Мөн төрийн албанд хууль бус томилгоо хийх, төрийн албан хаагчийг хохироох шийдвэр гарсаар байна. Төрийн Албаны Зөвлөл үүнийг бууруулахаар олон арга хэмжээ хэрэгжүүлж байгаа боловч төдийлөн сайн үр дүнтэй биш байгаа. Тиймээс хууль бус томилгооны мэдэгдэл цахим системд ирэх шинэчлэлийг хийж эхэллээ.
Тус системийг ажиллуулснаар төрийн албан тухай хуулийн болон албан тушаалын тодорхойлолтын шаардлагыг хангаагүй, сонгон шалгаруулалтад ороогүй хүмүүсийн томилгооны мэдээллийг бид авдаг болж байгаа. Ингэснээр тухайн томилгооны тухай шийдвэр гаргасан хүнд хуулийн дагуу эрсдэлээс сэргийлсэн зөвлөгөө, зөвлөмж өгнө. Дараа нь засаж залруулах боломжтой хугацаа өгнө. Тодорхой хугацааны дараа хууль бус томилгоотой холбоотой зүйлээ засаж залруулаагүй тохиолдолд манай байгууллага шийдвэрийг хүчингүй болгоно.
Шүүхийн тогтоолоор тухайн албан тушаалтан ямар төлбөрийг хэзээ улсад төлөх тухай мэдээллийг системээр дамжуулж харах юм. Энэхүү систем нь төрийн албан тушаалтнуудыг хариуцлагыг өндөржүүлж байна" хэмээн мэдээллээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
21 СЭТГЭГДЭЛТЭЙ
|
