Гэрэл зургийг MPA агентлагийн онцгой зөвшөөрөлтэйгөөр ашиглав

Монгол Улсын начин, тод манлай уяач, үндэсний сурын харвааны I зэрэгтэй Ц.Дуламсүрэн өнөөдөр Монгол Ньюс мэдээллийн төвд хаврын морин уралдаан, Үндэсний их баяр наадмын тухай хуулийн хэрэгжилтийг хангуулах асуудлаар мэдээлэл өглөө.

Тэрбээр "Монголчуудын хүн төрөлхтний түүхэнд оруулсан биет бус оюуны өмч, соёл гэж ЮНЕСКО-д бүртгэгдсэн гурван төрлөөр зүтгэж яваа учраас өөрийгөө өв тээгч мөн байх гэж бодож байна.

Ойрын өдрүүдэд "Дүнжингарав" нэр нь "Шөнөжингарав" болоод шүүхийн шийдвэрийн тогтоолоор хориглосон уралдааныг хэсэг бүлэг улсууд сэргээе гэж талбай дээр жагсаал хийлээ. Энэ жагсаалыг нь Төр засаг хүндэтгэлтэйгээр хүлээн авч, нэг талаасаа бол жагсаал юм шиг, нөгөө талаар найр юм шиг болсон.

Одоогоор Монголын Үндэсний Морин Уралдаан, Уяачдын Холбоо (МҮМУУХ) болон Монголын Морин Спорт Уяачдын Холбоо (ММСУХ) гэсэн хоёр байгууллага морины чиглэлээр үйл ажиллагаа явуулдаг.

Үндэсний баяр наадамд монгол морио уралдуулна гэсэн уриатай үйл ажиллагаа явуулдаг МҮМУУХ-г нь би тэргүүлдэг. Нөгөө холбоо нь саяхан наймдугаар их хурлаа хийгээд даргаа сонгосон, талбай дээр жагсаал хийдэг улсуудын ихэнх нь бүрдүүлдэг юм.

Гэхдээ би өнөөдөр холбоогоо төлөөлж ирээгүй. Харин өв тээгч иргэн, хууль эрхзүйч мэргэжилтэй хүний хувьд үзэл бодлоо илэрхийлье" гэв.

"Шүүхээр шийдсэн асуудлыг Засгийн газраас буцаах нь хууль бус" 

 

Гэрэл зургийг MPA агентлагийн онцгой зөвшөөрөлтэйгөөр ашиглав

Үргэлжлүүлэн "Хаврын "Дүнжингарав" уралдаан өв соёл мөн үү? Үүнийг өв соёл биш гэдгийг түмэн олон мэдэж байгаа. Үндэсний их баяр наадам, бөх, сур, морин уралдаантайгаа биет бус оюуны өв соёл гэдгийг хүлээн зөвшөөрсөн.

Эрлийз морь уралдуулах гэсэн хүмүүс "Монголоороо байя" гэж уриалдаг болжээ. Гуравдугаар сард морь уралдахгүй бол Монгол байхгүй болчих уу. 

УИХ-ын гишүүн Х.Баасанжаргал гишүүн улс төрийн захиалгаар ийм юм хийж байна гэж ярьсан. Би үүнийг баримттай гэж бодож байгаа. Талбай дээр янз бүрийн шалтгаанаар морьтой жагсъя гэхээр цагдаа нар нь гаргадаггүй. 

Би МҮМУУХ-ны тэргүүний хувиар үндэсний баяр наадмын хуульд зургаан насны монгол морио уралдуулж өгөөч гэж долоон морьтой залуутай орж ирээд цагдаад баригдаад буцаж байлаа. 

Бид уралдаан нээж өгөөч гэж яриагүй. Зөвхөн Үндэсний баяр наадмын тухай хуульд үндэсний морин уралдаан гэсэн заалт байдаг. Үүнд тавдугаар сарын 1-нээс арваннэгдүгээр сарын 1-нийг дуустал морь уралдах боломжтой. Энд найман настай хүүхдээр морь унуулахыг дэлхийд хүлээн зөвшөөрдөг. Учир нь өв соёл гэж бүртгээд авчихсан учраас хүлээн зөвшөөрөхөөс өөр аргагүй.

Засгийн газраас буруу шийдвэр гаргавал захиргааны хэргийн шүүхээр хэлэлцдэг. Засгийн газар 57 дугаар тогтоолыг гаргахдаа шүүхийн шийдвэрийг дагасан. Шүүхийн шийдвэр хүчин төгөлдөр байхад Засгийн газраас ингэж шийдвэрлэсэн нь буруу.

Тийм учраас хуульч, хүний эрхийн төлөө ажилладаг, хүүхдүүдийн эрхийг хамгаалдаг, жинхэнэ монгол хатан эмэгтэй УИХ-ын гишүүн гэж Х.Баасанжаргалыг дэмжиж байна" гэж ярилаа.