Нийслэл хот БНСУ-ын "Ти мони" ХК-аас 55%-ийн эзэмшлийг нэг сая доллароор худалдаж авахаар тохиролцжээ

Гэрэл зургийг MPA агентлагийн онцгой зөвшөөрөлтэйгөөр ашиглав

Улаанбаатар хотын нийтийн тээврийн салбарт 2015 оноос нэгэн шинэ өөрчлөлт орсон нь кондукторгүй болж, автобусны үйлчилгээний төлбөрийг картаар төлдөг болсон. Ингэхдээ нийтийн тээврийн үйлчилгээний төлбөрийн хэрэгсэл болох Umoney картыг "Улаанбаатар смарт карт" ХХК хариуцаж ажилладаг билээ. Уг компанийг нийслэлийн өмчид шилжүүлэхээр болсон байна.

Энэ талаар Нийслэлийн Засаг Даргын Тамгын Газрын дарга Д.Амгалан "НИТХ-ын 2024 оны 62 дугаар тогтоолоор Улаанбаатар хотын нийтийн зорчигч тээврийн салбарт үүссэн алдагдлыг бууруулах, төлбөр тооцооны системийг сайжруулах ажлын хүрээнд "Улаанбаатар смарт карт" ХХК-ийг үүсгэн байгуулагч БНСУ-ын "Ти мони" ХК-ийн эзэмшлийн 55%-ийг нийслэлийн өмчид шилжүүлэн авах асуудлаар хэлэлцээр хийж, үр дүнг танилцуулахыг нийслэлийн Засаг даргад үүрэг болгосон юм.

Энэ дагуу нийслэлийн Засаг даргын захирамж гарч, Эдийн засгийн хөгжил, дэд бүтцийн асуудал хариуцсан нэгдүгээр орлогчоор ахлуулсан ажлын хэсэг хэлэлцээрийг зохих журмын дагуу явууллаа. Хэлэлцээрийн үр дүнд БНСУ-ын "Ти мони" ХК-ийн "Улаанбаатар смарт карт" ХХК-д эзэмшиж байгаа 55%-ийн хувьцааг нэг сая ам.доллароор худалдаж авах, "Улаанбаатар смарт карт" ХХК-аас БНСУ-ын "Ти мони" ХК-ийн авах авлага болох 3.28 сая ам.долларыг 24 сарын хугацаанд хувааж төлөхөөр тохиролцсон.

Нөгөө тал болох БНСУ-ын "Ти мони" "Улаанбаатар смарт карт" ХХК-д зээлдүүлсэн 11.2 сая ам.долларыг тэглэх үүргийг хүлээсэн хэлцлийг байгуулаад байна. Хэлцлийн үр дүнд БНСУ-ын "Ти мони" ХК-аас худалдаж авсан 55%-ийн хувьцааг нийслэлийн өмчид бүртгүүлэх, улмаар "Улаанбаатар смарт карт" ХХК-ийн 21%-ийн хувьцааг эзэмшдэг иргэн, ААН-үүдтэй хэлцэл хийх замаар "Улаанбаатар смарт карт" ХХК-ийг 100% нийслэлийн өмчид шилжүүлэн авах асуудлаар тогтоолын төсөл боловсруулж, НИТХ-д танилцууллаа" гэв.

НИТХ-ын 2025 оны хоёрдугаар хуралдаанаас БНСУ-ын "Ти мони" ХК-ийн "Улаанбаатар смарт карт" ХХК-д эзэмшиж байсан 55%-ийг худалдаж авсантай холбогдуулан нийслэлийн өмчид бүртгэх, "Улаанбаатар смарт карт" ХХК-ийн 21%-ийн хувьцааг эзэмшигчидтэй хэлцэл хийж хувьцааг худалдаж авах, нийслэлийн өмчид бүрэн шилжүүлэх ажлыг зохион байгуулах, "Улаанбаатар смарт карт" ХХК-ийн бусад хувьцааг худалдаж авсантай холбогдуулан тус компанийн өмчийг нийслэлийн өмчид шилжүүлэн авах, бүртгүүлэх, компанийн дүрэм болон ТУЗ-ийн бүрэлдэхүүнийг батлуулах эрх, зөвшөөрөл, үүргийг нийслэлийн Засаг дарга Х.Нямбаатарт өгч, тогтоолыг баталжээ.

"Улаанбаатар смарт карт ХХК нь БНСУ-ын компани болж, нийслэл 24%-ийн хувьцааг эзэмшдэг тул нийтийн тээврийн зорчилтын тоо, төлбөрийн хэмжээг хянах боломжгүй байсан. Уг компанийг нийслэлийн өмчид шилжүүлснээр эдгээрийг хянадаг болно. "Улаанбаатар смарт карт" ХХК-ийг нийслэлийн өмчид шилжүүлснээр үйл ажиллагаа хэвийн үргэлжилнэ, татан буулгаж, кондуктор ажиллуулахгүй.

Цаашид үйл ажиллагааг “Улаанбаатар хотын хөгжлийн корпорац” ХК-д хариуцуулна гэж төлөвлөсөн байна.

Нийтийн тээврийн төлбөрийн системийг нэг жилийн хугацаанд сайжруулж, Umoney  картаас гадна бүх төрлийн банкны картаар төлбөрөө төлөх боломжийг бүрдүүлсэн" гэж тэрбээр тайлбарлав.