Б.Мөнхзул: Хувь хүний цалин нь өсөх тусам торгууль, шийтгэл шиг татвар төлж байгааг болиулж, нэг шатлалтай болгох хэрэгтэй

Гэрэл зургийг MPA агентлагийн онцгой зөвшөөрөлтэйгөөр ашиглав

Аж ахуйн нэгжийн орлогын албан татварын тухай хуулийн хэрэгжилт хэлэлцүүлэг өнөөдөр Төрийн ордонд боллоо. 

Хэлэлцүүлгийн үеэр "Жүр Үр" ХХК-ийн гүйцэтгэх захирал Б.Мөнхзул "Манай улсын эдийн засгийн 80 гаруй хувийг уул уурхай л бүрдүүлж байгаа. Эдийн засгийг солонгоруулах эдийн засгийн таатай нөхцөлийг олгохын тулд үлдсэн 20 орчим хувийг эзэлж байгаа бусад салбаруудынхаа ААН орлогын албан татварыг 10 хувь гэсэн нэг шатлалтай болгох хэрэгтэй. 

Ажиллагсдад зориулсан зардлыг татвар ногдох орлогоос хасдаггүйг хасдаг болгож өөрчлөх нь зүйтэй. 

Алслалын заалтуудыг алслалыг нь бууруулах буюу 200, 300 км-ээс цаашхыг хөнгөлөлтөд хамруулдаг болгож өгвөл төвлөрлийг бууруулахад хувь нэмэр оруулна гэж харж байна. 

Хувь хүний орлогын албан татварыг 10 хувь гэсэн нэг шатлалтай болгох хэрэгтэй байна. Хувь хүний цалин хөлс нь ихсэх тусам тэр нь торгуул шийтгэл юм шиг 10, 15 гэсэн шатлалууд үйлчилж байна. 1 сая төгрөгийн цалинтай хүн 100,000-г 10,000,000 төгрөгийн цалинтай хүн 1 сая гэх зэргээр угаас олж байгаа орлогынхоо хэмжээгээр ялгаатай татвар төлж байхад дахиад нэмж төлүүлж байгаа нь тэгш шударга байх зарчмыг хангахгүй байна. Энэ нь "Чи яах гэж илүү мэдлэг эзэмшсэн юм? Тийм болохоор чи илүү торгууль төлөх ёстой" гэж байгаа юм шиг ойлгомжгүй байдал үүсгэж байна. 

Хувь хүний орлогын албан татварын хөнгөлөлт буюу хамгийн бага цалинтай хүн 4 хувь, цалин нь өсөхийн хэрээр 0.4 хувь хүртэл буурдаг. Тогтмол тоо заачихсан байдаг зэрэг нь татвар маш ойлгомжтой, тайлагнахад хялбар байх ёстой гэсэн зарчмыг алдагдуулж байгаа юм. Олон ажилтантай ААН энэ хөнгөлөлтийг бодох гэж маш их хугацаа алддаг. Хөдөлмөрийн хөлсний доод хэмжээгээр хөнгөлөлт үзүүлнэ гэдэг заалтаараа явчих боломжтой гэж харж байна. 

НӨАТ-ын хууль дээр байгаа маш олон чөлөөлөлт, хөнгөлөлтийг болиод бүгд тохирсон хэмжээгээр төлдөг болъё" гэв.