АНУ-д оршин суугаа монгол иргэдийн АНХААРАЛД

Гэрэл зургийг MPA агентлагийн онцгой зөвшөөрөлтэйгөөр ашиглав

АНУ-д амьдарч буй бичиг баримтын зөрчилтэй гадаадын иргэдийг саатуулна, албадан гаргана гэсэн мэдээлэл гарч буйтай холбогдуулан Иллинойс мужийн цагаачид, дүрвэгсдийн эрхийг хамгаалах эвсэл (Illinois Coalition for Immigrant & Refugee rights, ICIRR)-ээс гаргасан мэдээллийг Иллинойс мужийн захирагчийн алба зэрэг байгууллагаас түгээж буйг монгол хэл рүү орчуулан хүргэж байна.

ЦАГААЧЛАЛЫН АЛБА(ICE)-НЫ АЖИЛТАНТАЙ ХАРЬЦАХДАА МЭДЭЖ БАЙВАЛ ЗОХИХ ТАНЫ ЭРХ:

Хэрэв та ICE-аас ажиллагаа явуулж буйтай таарвал ICIRR-ийн гэр бүлийн дэмжлэгийн 24 цагийн шуурхай утас (1-855-435-7693) руу залгаж мэдээлээрэй.

Хэрэв та ажил дээрээ, эсвэл олон нийтийн газар ICE-ийн ажилтантай харьцах тохиолдолд дараах зүйлсийг анхаарна уу:

• ICE-ийн ажилтнууд таныг байцаах, эсвэл баривчлах тохиолдолд дуугүй байх эрхтэй.
• Тайван байж, хоёр гараа тухайн ажилтны нүдэнд ил харагдахуйц байдалд байлгах.

Дараах зүйлсийг ХИЙЖ БОЛОХГҮЙ:

• Цагаачлалын буюу иргэншлийн статусынхаа талаар цагдаа, цагаачлалын ажилтан, эсвэл бусад албан тушаалтантай ярилцах,
• Агуулгыг нь ойлгоогүй ямар нэгэн бичиг баримтад гарын үсэг зурах (Та өмгөөлөгчтэй ярилцах хүсэлтэй байгаагаа илэрхийлэх ёстой)

Хэрэв цагаачлалын албаны ажилтан таны гэрийн хаалгыг тогшвол хаалгаа битгий нээгээрэй. Хүүхдүүддээ ч гэсэн хаалгаа нээхгүй байхыг захиарай.

• ICE-ийн ажилтнууд таны гэрт нэвтрэхийн тулд шүүгчийн гарын үсэгтэй баривчлах зөвшөөрөлтэй байх ёстой. ICE-ийн “баривчлах зөвшөөрөл” нь шүүгчийн гарын үсэггүй байдаг бөгөөд тухайн албаны ажилтнууд гарын үсэг зурсан хүснэгтүүд байдаг. Тиймээс тэдгээр баримт бичиг таны зөвшөөрөлгүйгээр таны гэрт нэвтрэх эрхийг ICE-ийн ажилтнуудад олгохгүй.

Хэрэв та гадуур явж байхад ойр хавьд тань ICE-ийн ажилтнууд байна гэж үзвэл:

• Аюулгүй газар руу ороорой.
• Хэрэв та АНУ-ын иргэн бөгөөд аюулгүй гэж үзвэл, явагдаж буй ажиллагааг утсаараа бичих, эсвэл харсан зүйлсийнхээ талаар тэмдэглэл хөтөлж болно. Гэхдээ тухайн ажиллагаанд хөндлөнгөөс оролцох, эсвэл саад учруулахаас зайлсхийх ёстой.

Дараах зүйлсийг ХИЙЖ БОЛОХГҮЙ:

• Баталгаажаагүй мэдээллийг олон нийтийн сүлжээнд нийтлэх,
• Мөрдөн шалгалтын ажиллагаанд хөндлөнгөөс оролцох зэргээр өөрийгөө эрсдэлд оруулах

Хэрэв ICE таныг баривчлах тохиолдолд танай гэр бүлийнхэн яах вэ гэсэн нөөц төлөвлөгөө гаргаж, дараах алхмыг тусгаарай. Үүнд:

• Яаралтай холбоо барих хүмүүсээ тодорхойлж, утасны дугааруудыг нь цээжлэх,
• Хүүхдийнхээ сургууль, цэцэрлэгт онцгой тохиолдлын үед хүүхдүүдийг чинь авах хүмүүсийн утасны дугаарыг өгөх,
• Хүүхдүүдтэй чинь холбоотой эрүүл мэндийн болон эрх зүйн шийдвэр гаргах эрхийг онцгой тохиолдолд холбоо баримт хүмүүстээ бичгээр өгөх,
• Хэрэв таныг ICE саатуулах тохиолдолд ICE-ийн locator.ice.gov гэсэн сайтаар орж таны талаарх мэдээллийг хайж олох боломжтойг ойр дотны хүмүүстээ мэдээлэх,
• Хэрэв та саатуулагдсан бол хууль зүйн туслалцаа үзүүлэх хүнтэй холбогдох нь маш чухал. 1-855-435-7693 дугаарт залгаж, цагаачлалын өмгөөлөгчтэй холбогдоорой.

Нэмэлт мэдээллийг дараах вебсайтаас авах боломжтой:

• Албадан гаргалтын эсрэг цагаачдад эрх зүйн туслалцаа үзүүлэх төв: immigrantjustice.org
• Албадан гаргалтын эсрэг эх сурвалжуудын гарын авлага: organizedcommunities.org

Эх сурвалж: Монгол Улсаас АНУ-ын Чикаго хотод суугаа Консулын газар