ИНФОГРАФИК: Монголчууд бүх нийтээр амрах баярын өдрүүдэд дэлхийн дунджаас хоёр хоногоор илүү амардаг

Гэрэл зургийг MPA агентлагийн онцгой зөвшөөрөлтэйгөөр ашиглав

Монгол Улсын Нийтээр тэмдэглэх баярын болон тэмдэглэлт өдрүүдийн тухай хуульд заасны дагуу монголчууд жилд есөн баяраар нийт 16 өдөр амардаг.

#2025 онд монголчуудын бүх нийтээр амрах баярын өдрүүд

Энэ жилийн тухайд эдгээр өдрүүдийн гурав нь Бямба гарагт, гурав нь Ням гарагт тохиож буй.

Тодруулбал Цагаан сарын шинийн 1, Олон улсын эмэгтэйчүүдийн өдөр, Үндэсний их баяр наадмын гурав дахь өдөр Бямба гарагт таарч байгаа бол Цагаан сарын шинийн 2, Хүүхдийн баяр, Үндэсний их баяр наадмын дөрөв дэх өдөр нь Ням гарагт таарч байна.

Түүнчлэн Нийтээр тэмдэглэх баярын болон тэмдэглэлт өдрүүдийн тухай хуульд 2022 оны 6 дугаар сарын 28-нд нэмэлт оруулж 7-р сарын 10-ныг амралтын өдөр болгосноор Үндэсний их баяр наадмаар нийт 6 хоног амардаг болсон.

Бүх нийтийн амралтын өдөр болох бүрд амрах нь зөв, буруу гэсэн маргаан нийгэмд талцал үүсгэсээр ирсэн ба нэг талаас монголчуудын амралт ихсэж, ажиллах өдрүүд цөөн байна гэсэн асуудлыг тавьдаг бол нөгөө хэсэг нь дэлхийн жишгийн дагуу амарч байна гэсэн байр суурийг илэрхийлдэг.

Тэгвэл дэлхийн бусад улс орнуудад нийтээр тэмдэглэх баярын өдрүүд хэд хоног үргэлжилдэг талаар танилцуулъя.

#Дэлхийн улс орнуудын бүх нийтийн амралтын өдрүүдийн тоо

Энэтхэг, Балба улсууд нь дэлхийн улс орнуудаас хамгийн олон буюу жилд нийт 35 орчим хоног амардгаараа тэргүүлж байгаа бол эдгээр улсуудын араас Иран, Мьянмар, Шри Ланка зэрэг Ази тивийн төлөөлөл нийт 26, 25 өдөр амардгаараа удаалж байна.

Харин хамгийн цөөн хоног амардаг улсуудад АНУ, Вьетнам, Их Британи, Нидерланд улсууд багтжээ. АНУ, Вьетнамын иргэд жилд дунджаар бүх нийтийн амралтын өдөр хэмээн 6 өдөр амардаг бол нидерландчууд 7 өдөр, их британичууд 8 өдөр амардаг байна. 

Дундчилж авч үзвэл дэлхийн нийт хүмүүс жилд бүх нийтийн амралтаар 14.2 хоног амардаг аж.