Вашингтон хотод эрс хүйтрэх тул Трампын тангараг өргөх ёслолыг дотор зохион байгуулахаар болжээ

Ойрын өдрүүдэд Вашингтон хотод эрс хүйтрэх цаг уурын мэдээтэй байгаа тул АНУ-ын ерөнхийлөгчийн сонгуулийн ялагч Дональд Трампын тангараг өргөх ёслолыг дотор орчинд зохион байгуулахаар болжээ.

Арга хэмжээг Капитолын ордны бөмбөгөр оройтой Ротунда танхимд зохион байгуулахаар болсон байна.

“Вашингтон хотын цаг агаарын урьдчилсан мэдээгээр хүчтэй салхитай, агаарын температур хамгийн доод түвшиндээ хүрч болзошгүй байна. Умард туйлын хүйтэн агаарын урсгал манай улс орныг нөмөрч байгаа. Тиймээс би хүмүүсийг ямар нэг байдлаар зовоохыг хүсэхгүй” гэж Трамп өчигдөр сошиал хуудсандаа бичжээ.

Ротунда танхим нь АНУ-ын ерөнхийлөгчийн тангараг өргөх ёслолд цаг агаар нөлөөлсөн тохиолдолд ашиглагдах зориулалттай байдаг.

Хамгийн сүүлд 1985 онд ерөнхийлөгч Рональд Рейган хоёр дахь удаагаа сонгогдсоны дараах тангараг өргөх ёслол энд зохион байгуулагдаж байжээ.

 

Рональд Рейганы тангараг өргөх ёслол 1985 он

Тухайн үед Вашингтонд агаарын температур Цельсийн -14 хэм хүрч байсан юм. Ирэх Даваа гарагийн үд дунд агаарын температур Цельсийн -6 хэм хүрэх төлөвтэй байгаа ажээ.

Энэ нь Рейганы тангараг өргөсөн өдрөөс хойших хамгийн хүйтэн өдөрт тооцогдож байна.

2009 онд Барак Обамагийн ёслол -2 хэмийн хүйтэнд гадаа зохион байгуулагдаж байжээ.

Даваа гарагт хүйтрэхээс гадна салхины хурд 48-56 км/цаг хүрэх тул цаг агаарын нөхцөл байдал улам хүндрэх юм байна.

Трампын тангараг өргөх ёслолыг Капитолын ордны гадна үзэхээр 250,000 орчим хүн цугларах юм.

Хэрвээ ёслолыг дотор зохион байгуулах бол тэдэнд зориулсан өөр төлөвлөгөө хэрэгтэй болно. Трамп танхимд тангараг өргөснийхөө дараа Капитолын ордноос гарч, гадаа цугларсан иргэдэд хүндэтгэл үзүүлэхээ амлажээ.

Ёслолын арга хэмжээг зохион байгуулах хороо одоогоор ямар нэг төлөвлөгөө зарлаагүй байна.

Эх сурвалж: Associated Press