"Эрчим хүчний салбарын цалинг дор хаяж 30 хувь нэмэх шаардлагатай. Харамсалтай нь хоёр холбооны үл ойлголцлоос болоод салбарын яамтайгаа хэлэлцээ хийж чадахгүй байна"
Дулаан Цахилгаан Үйлдвэрлэгч, Түгээгчдийн Үйлдвэрчний Эвлэлийн Холбооны төлөөллүүд өнөөдөр Үндэсний Мэдээллийн Төвд мэдээлэл хийлээ.
Эрчим хүчний салбарынхан өндөр хүчдэл, чанга дуу чимээ гээд хүнд нөхцөлд ажилладаг. Тиймээс цалин хөлсөө нэмэгдүүлэх шаардлагыг удаа дараа тавьж байгаа юм.
Цахилгааны үнэ тарифыг нэмсэн шалтгаануудын нэг нь ажилчдын цалин хөлсний асуудал байсныг тэд онцолсон. Харамсалтай нь энэ ажил удаашралтай байгааг салбарынхан шүүмжилж байв.
Тус холбоо ийм шалтгаанаар Эрчим хүчний яамд хандан хэлэлцээ хийх санал тавьсан. Үүний тулд Монголын Эрчим Хүч, Геологи, Уул Уурхайн Үйлдвэрчний эвлэлийн холбоотой хамтран хэлэлцээд оролцох ёстой боловч тэдний зүгээс ямар нэг хариу өгдөггүй талаар ярьсан юм.
Энэ талаар хэвлэлийн хурал зарласан холбооны төлөөллүүд "Хөдөлмөрийн арбитрын шийдвэрээр хоёр холбоо саналаа нэгтгээд, салбарын яамтайгаа хэлэлцээнд орох ёстой. Мөн Хөдөлмөрийн тухай хуулийн 18 дугаар зүйлийн 2-т зааснаар "Энэ чиг үүргийг төрийн захиргааны байгууллага чиглүүлж ажиллах ёстой" гэж заасан байдаг.
Харамсалтай нь энэ холбоонд Монгол Улсын хууль үйлчлэхгүй байна. Хөдөлмөрийн тухай хуульд зааснаар арбитрын шийдвэр эцсийнх байна гэж тодорхой бичсэн байдаг.
Тэд хуулиа биелүүлэхгүй байгаа тул гишүүд нь шаардлага тавих хэрэгтэй" гэж онцоллоо.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
22 СЭТГЭГДЭЛТЭЙ
|
