"Ирэх жил Улаанбаатар хотод эхний ээлжид 20 мянган айлыг хийн шугам сүлжээнд холбоно"
Хотын дарга Х.Нямбаатар ирэх жил агаарын бохирдлыг бууруулах чиглэлээр авч хэрэгжүүлэх арга хэмжээний талаар дараах мэдээллийг өглөө.
Ирэх жил Улаанбаатар хотод эхний ээлжид 20 мянган айлыг хийн шугам сүлжээнд холбох, хийн эх үүсвэрийг бэлдэх цаашлаад яндангүй бүсийн бүсчлэлийг тогтоосон хууль эрхзүйн орчныг батлахаар төлөвлөөд байгаа аж.
Мөн тус бүсчлэлдээ хийн болон керосин зуухнуудыг хэрэглээнд нэвтрүүлж, бусад айл өрхүүдэд түлшийг өөрчлөх, давхар шаталтад зуухыг тараах зэрэг ажлуудыг богино хугацаанд хийж хэрэгжүүлэх юм байна.
Түүнчлэн агаарын бохирдлыг үүсгэж байгаа бүх үүсгэврүүд дээр нэг жилийн хугацаанд авах арга хэмжээгээ танилцуулна гэв.
Тухайлбал нийтийн тээврийн үйлчилгээнд явж байгаа автобуснуудыг хийн болон цахилгаан хөдөлгүүр рүү шилжүүлэх төлөвлөгөөг гаргаж байгаа аж.
Мөн агаарын чанарын хүлцэх хэмжээнээс илүү агаарыг бохирдуулж байгаа тээврийн хэрэгслүүдийг хөдөлгөөнд оролцуулахгүй байх, 170 уурын зуухнуудыг жил бүр 30 хувийг нь хийн дулааны станц руу шилжүүлэх технологийн дэвшлийг ашиглана гэлээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
