Улсын тусгай хамгаалалттай газруудын хамгааллын менежментийг хувийн хэвшилд шилжүүлэхээр боллоо

Гэрэл зургийг MPA агентлагийн онцгой зөвшөөрөлтэйгөөр ашиглав

Байгаль Орчин, Уур Амьсгалын Өөрчлөлтийн Яам (БОУАӨЯ)-нд Улсын тусгай хамгаалалттай газруудын хамгааллын менежментийг хувийн хэвшилд шилжүүлэх арга хэмжээ боллоо.

Энэхүү санамж бичиг байгуулах ёслолын хүрээнд тус яам 10 хуулийн этгээд, төрийн бус байгууллагатай хамтран ажиллахаар болсон байна. 

Тус яамны сайд С.Одонтуяа "Хувийн хэвшлүүдтэй хамтран ажиллах гарын үсэг зурснаар 2025 онд салбарын эрхзүйн орчныг сайжруулах, дүрэм журмыг цэгцлэх, хувийн хэвшлийг дэмжихэд чиглэж байна.

Сүүлийн үед агаарын бохирдлын асуудал их яригдах болсон. Аливаа байгалийн гамшгийг бид хувийн хэвшилтэйгээ хамтран давах талаар судалж байгаа.

Тийм учраас ногоон эдийн засгийг түргэтгэх зорилгоор Монгол Улсын Хөгжлийн Банктай хамтран ажиллахаар гарын үсэг зурж байна" гэж онцоллоо.

Уг санамж бичиг нь уур амьсгалын өөрчлөлтийг сааруулах, дасан зохицохын хүрээнд ногоон хөгжлийг дэмжсэн үндэсний хэмжээний томоохон төсөл хөтөлбөрийг санхүүжүүлэх, ногоон санхүүжилтийн эх үүсвэрийг татан төвлөрүүлэх, тогтвортой хөгжлийн бодлоготой уялдсан тэргүүлэх ач холбогдол бүхий төслүүдийг хэрэгжүүлэх, Монгол Улсад байгаль орчин, эдийн засгийн хэмжигдэхүйц үр өгөөжийг бий болгох зорилготой санамж бичиг аж.