Х.Баттулга: Нарийн царигтай байсан бол бид газар нутгаа 100 жилээр алдах байсан

Гэрэл зургийг MPA агентлагийн онцгой зөвшөөрөлтэйгөөр ашиглав

Монголд ажиллах гадаад ажилчдын тоо, хувь хэмжээ тогтоохгүй байх агуулгатай хуулийн төслийг эсэргүүцсэн иргэдийн цуглаан өчигдөр Төрийн ордны гадна болов. Энэ үеэр УИХ-ын гишүүн Х.Баттулгыг сэтгүүлчид “барьж авч” цөөн асуултад хариулт авчээ. Сэтгүүлчдийн асуулт болон Х.Баттулга гишүүний хариултыг товчлон хүргэе.

-Та гадна байгаа жагсагчдад үүрэг чиглэл өгч байгаа юу. МоАХ-ын гишүүд байсан. Мөн Засгийн газрын хэрэгжүүлэхээр төлөвлөсөн мега төслүүдийг эсэргүүцэж байгаа юу?

-Над руу ингэж зохион байгуулалттай дайрдгаа одоо та нар боль л доо. МоАХ-ынхан байхгүй. Ард иргэд яагаад өөрсдөө жагсаж болдоггүй юм.

Мега төсөл ярьж байгаад би бахархаж байгаа. Мега төслүүд явах ёстой.

-Өргөн царигтай байх бодлогыг та батлуулсан. Гэтэл өнөөдөр буруу байсан нь харагдаж байна. Та үүнд ямар хариулт өгөх вэ?

-Яагаад буруу гэж. Нарийн царигтай байсан бол бид газар нутгаа 100 жилээр алдах байсан юм. Эдийн засгийн бодлого ярихаасаа илүү тусгаар тогтнолоо ярих ёстой.

Царигийн асуудлыг Үндэсний аюулгүй байдлын зөвлөл болон Ерөнхийлөгчийн удаа дараагийн айлчлалаар тохирдог юм. Нэг хүн шийддэг асуудал биш. УИХ-аар оруулж баталдаг. Та нар сэтгүүлч юм бол үүнийг яагаад ойлгодоггүй юм.

Төмөр зам ерөнхийдөө ашиглалтад орж байна. Би үүгээрээ бахархдаг. Цаашдаа ч бахархана. Газрын баялгаа газар нутагтайгаа 100 жилээр алдах байсны зогсоосон. Цаашдаа ч зогсооно.

Өнөөдөр гадаад ажилчдын асуудал орж ирж байна. Үүний эсрэг би тууштай зогсоно. МоАХ ч тууштай зогсоно.

-Манай улс нарийн царигтай байсан бол нүүрсээ шууд гаргаж байх байлаа. Гэтэл та өөр зүйл яриад байна.

-Гаргаад л байгаа шүү дээ.

-Холболт хийх шаардлага байхгүй байсан.

-Бүх улсын гаалийн царигууд нь өөр байдаг юм. Та нар битгий ингэж өөр зүйл рүү орж дайраад бай. Монголын тусгаар тогтнолоо бод, баялгаа бол за юу.