О.Алтангэрэл: Жагсаал цуглаан хийнэ гэвэл 48 цагийн өмнө мэдэгдэнэ. Зөвшөөрсөн эсэх хариу хүлээх шаардлагагүй болно

Гэрэл зургийг MPA агентлагийн онцгой зөвшөөрөлтэйгөөр ашиглав

Хууль Зүй, Дотоод Хэргийн сайд Засгийн газрын ээлжит хуралдаанд хүний эрхийг хамгаалах хоёрдугаар хөтөлбөрийг танилцуулсан байна.

Тус хөтөлбөрийг хэрэгжүүлэх хүрээнд Хүний эрхтэй холбоотой багц хуулийн төслүүд, Жагсаал цуглаан хийх эрх чөлөөний тухай, Хэвлэлийн эрх чөлөөний тухай хуулийн төслийг УИХ-д өргөн барихаар болсон талаар ХЗДХ-ийн сайд О.Алтангэрэл мэдээлэл өглөө. 

Тэрбээр "Хүний эрхийг хангах багц хуулийн төсөл батлагдвал сүүлийн жилүүдэд тогтмол ухарч буй манай улсын хүний эрх, эрх чөлөөний индекс урагшилна. Мөн Монгол Улсын иргэн өөрийн эрх чөлөөгөө хууль тогтоомжийн хүрээнд баталгаатай эдлэх нөхцөл бүрдэнэ. 

Хэвлэлийн эрх чөлөөний хуулийг дагалдаж зургаан хуульд нэмэлт өөрчлөлт орно. Хүний эрхийг багц хуулийн хэрэгжилттэй холбоотойгоор Төрийн болон албаны нууцын тухай хууль, Зөрчлийн тухай хуульд нэмэлт өөрчлөлт орно. 

Иргэд, олон нийтийн байгууллага, улс төрийн нам эсвэл, хүчин жагсаал цуглаан хийх шаардлагатай гэвэл 48 цагийн өмнө мэдэгдэнэ. Ингэснээр зөвшөөрсөн эсэх хариу хүлээх шаардлагагүй. 48 цагийн өмнө мэдэгдэх нь олон улсын нийтлэг жишиг юм. Учир нь жагсаал цуглаан хийх үеэр бусад иргэний болон нийтийн аюулгүй байдал алдагдах ёсгүй. 

Цагдаагийн байгууллага жагсаал цуглаан хийж буй хүмүүсийн аюулгүй байдлыг хамгаалах чиг үүргээ гүйцэтгэнэ. Гэхдээ жагсаал цуглаан хийх журамд хориотой байсан зүйлүүдийг хэвээр үлдээнэ. 

Харин нийтийн авто зам дээр дураараа жагсаж болохгүй. Цагдаагийн байгууллагаас зөвшөөрөл авна. Түүнчлэн жагсаал цуглааныг улс төрийн албан тушаалтан албан тараадаг байсныг төрийн захиргааны албан тушаалтнаар гүйцэтгүүлэхээр болсон" гэв. 

Үргэлжлүүлэн Хэвлэлийн эрх чөлөөний тухай хууль батлагдсанаар гарах үр дүнгийн талаар тэрбээр "Урьд нь зөвхөн МҮОНРТ-ийн сэтгүүлч эх сурвалжаа хамгаалах эрхтэй байсан. Харин одоо бол сэтгүүл зүйн үйл ажиллагаа явуулж буй сэтгүүлчид эх сурвалжаа хамгаалах эрхтэй гэж энэ хуульд тусгасан. 

Бодит байдалтай нийцэхгүй байгаа эндүүрсэн, ташаарсан мэдээллийн олон урсгалаас болж сэтгүүлчийг хавтгайруулж ял шийтгэл оногдуулдаг байдлыг энэ хуулиар багасгана" хэмээн ярилаа.