Чанаргүй зээлийн хэмжээ энэ оны эхний 11 сард өмнөх жилийн мөн үеэсээ ₮106 тэрбумаар буурч, ₮2.1 их наяд болов

Гэрэл зургийг Mpa.mn

Мөнгөний нийлүүлэлт 2024 оны 11 дүгээр сарын эцэст урьдчилсан гүйцэтгэлээр 41.5 их наяд төгрөг болж, өмнөх оны мөн үеэс 6.1 их наяд төгрөгөөр буюу 17.2% өссөн байна. 

Ингэхэд төгрөгийн хадгаламж 5.2 их наяд төгрөгөөр буюу 32.5%, төгрөгийн харилцах 2.6 их наяд төгрөгөөр буюу 36.2% өссөн нь нөлөөлжээ.

Төгрөгийн хадгаламжийн

• 18.1 их наяд төгрөг нь иргэдийн хадгаламж,
• гурван их наяд төгрөг нь аж ахуйн нэгж, байгууллагынх юм.

Валютын хадгаламж 4.5 их наяд төгрөг болж, өмнөх сараас 1.7% буюу 76.5 тэрбум төгрөгөөр өссөн байгаа ч өмнөх оны мөн үетэй харьцуулж үзвэл 6.7% буурчээ.

Харин зээлийн тухайд аж ахуйн нэгж, байгууллага, иргэдэд олгосон нийт зээлийн өрийн үлдэгдэл 2024 оны 11 дүгээр сарын эцэст 35.9 их наяд төгрөг болж, өмнөх оны мөн үеэс 33.5% өсөв.

Нийт зээлийн өрийн үлдэгдлийн

• 60.9% нь иргэд,
• 37.4% нь хувийн байгууллага,
• 0.7% нь төрийн байгууллага,
• 1% нь санхүүгийн байгууллага болон бусад байна.

Одоогоор 1.3 тэрбум төгрөгийн анхаарал хандуулах зээл байгаа бол чанаргүй зээлийн хэмжээ 2.1 их наяд төгрөгт хүрчээ. Чанаргүй зээлийг өнгөрсөн оны мөн үетэй харьцуулбал 4.9% буюу 106 тэрбум төгрөгөөр буурсан бөгөөд нийт зээлийн өрийн үлдэгдлийн 5.8%-тай тэнцэж байна.