Сирийн босогчид Ассадын дэглэмийн мансууруулах бодисын бизнесийг ил болгов

Сирийн дарангуйлагч Башар аль Ассадын дэглэм богино хугацаанд нуран унаснаар түүний бохир үйл ажиллагаанууд ил болсоор байна.

Тухайлбал засгийн эрхийг авсан босогчид саяхан Каптагон мансууруулах бодисыг бөөнөөр үйлдвэрлэж, экспортолдог байгууламжийг илрүүлжээ.

Ассадын дэглэм амфетамин төрлийн энэхүү бодисыг Ойрх Дорнодын орнуудын хар захаар түгээн борлуулж, их хэмжээний ашиг олдог байсан байна.

Хаяат Тахрир аль Шам (ХТШ) бүлгээр удирдуулсан босогчид асар их хэмжээний Каптагоны нөөц илрүүлснээ мэдэгдээд тэдгээрийг устгахаа амлажээ.

Энэ долоо хоногт ХТШ-ын удирдлагууд гадаадын сэтгүүлчдэд Дамаск хотын гадна оршдог агуулахыг үзүүлсэн байна. Энд Каптагоны шахмалыг цахилгаан эд ангиудын дотор нууж, экспортлох ажиллагаа явуулдаг байжээ.

Уг байгууламж Сирийн ерөнхийлөгч асан Башар аль Ассадын төрсөн дүү Махер аль Ассадын мэдэлд байсан байна.

Сирийн армийн командлагч, генерал Махер аль Ассадыг дэглэмийн хар тамхины наймааны гол хүн байсан гэдэг.

Ассадын дэглэм унасны дараа тэр оргон зайлсан юм.

 

“Бид эндээс Каптагоны шахмалаар дүүргэсэн олон тооны цахилгаан багаж хэрэгсэл илрүүлсэн. Тоо хэмжээ нь асар их. Одоогоор хэлэх боломжгүй байна” гэж ХТШ-ын офицер Абу Малек аль Шами сэтгүүлчдэд мэдээлжээ.

Каптагон бол синтетик өдөөгч фенетиллиний брэнд нэр юм.

Үүнийг анх 1960-аад оны үед сэтгэцийн хямралыг эмчлэх зорилгоор үйлдвэрлэж эхэлсэн ч хэт донтуулдаг шалтгаанаар 1980-аад оноос ихэнх улс оронд хориглож байжээ.

Түүхий эд нь хууль ёсны арга замаар хялбар олддог тул Каптагоныг үйлдвэрлэх өртөг бага, үнэ хямд байдаг.

13 жилийн турш үргэлжилсэн Сирийн иргэний дайны турш Каптагоны орлого Ассадын дэглэмийг санхүүжүүлж байсан гэж үздэг юм.

2022 оны мөрдлөгөөр Каптагон нь Сирийн хамгийн том экспортын бүтээгдэхүүн болсныг тогтоож байжээ.

Бүр хэмжээгээрээ хууль ёсны бүх экспортыг нь нийлүүлснээс ч давж байв.

 

Йордан, Ирак, Саудын Араб болон Персийн булангийн орнуудад Сирийн олон зуун сая шахмал Каптагон хууль бус замаар нийлүүлэгддэг.

Ассад энэ бизнесээ Арабын орнуудыг сүрдүүлэх хөшүүрэг болгож байсан баримт бий.

Тухайлбал тэр Каптагоныг ашиглан нийгэмд нь тогтворгүй байдал үүсгэхээр сүрдүүлдэг байжээ.

Ийм аргаар Ассад 2023 онд Сири улсыг Арабын Орнуудын Лигт дахин элсүүлэх шийдвэрийг Саудын Араб болон Персийн булангийн орнуудаар гаргуулж чадсан гэдэг.

Сирийн босогчид энэхүү мансууруулах бодисыг устгаж, хөрш орнууддаа дахин аюул занал учруулахгүйг амлаж байна.

Эх сурвалж: AFP