Б.Батцэцэг: Япон дахь Элчин сайдын яамны барилгыг нураагаад шинээр барих эсвэл газраа зараад өөр газар байр худалдаж авах хоёр л сонголт байгаа
Аюулгүй байдал, гадаад бодлогын байнгын хорооны өнөөдрийн хуралдаанаар ирэх оны төсвийн тухай хуулийн төслийг хэлэлцэв. УИХ-ын гишүүн Г.Хосбаяр төсөвтэй холбогдуулан Япон улс дахь манай улсын Элчин сайдын яамны барилгын асуудлыг Засгийн газраас тодрууллаа.
УИХ-ын гишүүн Г.Хосбаяр: Боловсролын сайдаар ахлуулсан УИХ-ын найман гишүүн Япон улсад очиж ажилласан. Тус улс дахь Элчин сайдын яамнаас биднийг хүлээн авч тулгамдсан асуудлаа танилцуулсан юм. Элчин сайдын яамны барилга муудсан, хулгана харх гүйдэг, ажиллаж амьдрахад таагүй нөхцөлтэй болсныг бидэнд танилцуулсан. Хуучирч муудахаас гадна газар хөдлөлтийн аюулгүйн байдал хангахгүй болсон. Тус улсад суугаа Элчин сайд энэ асуудлыг уламжилж өгөхийг биднээс хүссэн юм. Гэтэл ирэх оны төсөвт гадаад улсад байгаа дипломат байгууллагын барилга, байшинтай холбоотой санхүүжилт тусгагдаагүй байна.
Гадаад харилцааны сайд Б.Батцэцэг: Бид 2016 оноос хойш хэмнэлтийн горимоор ажиллаж байгаа. Гадаадад байгаа Элчин сайдын яамдын барилгаа өөд нь татах, зарим газар үл хөдлөх хөрөнгө худалдаж авах зайлшгүй шаардлага байгаа.
Япон улсад байгаа Элчин сайдын яамны тухайд газар хөдлөлтөд тэсвэргүй, барилгыг зас гэдэг шаардлагыг айлын талаас тавьдаг. Өртөг нь өндөр учраас одоо засвар хийгээд нэмэргүй болсон. Одоо барилгыг нураагаад шинээр барих эсвэл газраа зараад өөр газар байр худалдаж авах хоёр л сонголт байгаа. Манай Элчин сайдын яамны байршил маш ашигтай, А зэрэглэлийн бүсэд байдаг.
Элчин сайдын яамны байрыг засахад доод тал нь 15 мянган ам.доллар. Гэвч ирэх жилийн төсөвт энэ санхүүжилтийг тусгаж чадаагүй.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
35 СЭТГЭГДЭЛТЭЙ
|
