БНХАУ-ын хөрөнгө оруулагчид трамвай, Туулын хурдны замын төсөлд хамтран ажиллах хүсэлтэй байгаагаа илэрхийлэв

Улаанбаатар хотод богино хугацаанд олон хүн тээвэрлэх боломжтой трамвайны урьдчилсан ТЭЗҮ-ийг ирэх оны хоёрдугаар сард боловсруулж дуусгахаар ажиллаж байгаа аж. Ирэх оны нэгдүгээр улиралд багтаан босоо тэнхлэгийн нэг шугамыг хийх бөгөөд уг шугамын чиглэл нь Зунжин худалдааны төвөөс Сүхбаатарын талбай хүртэл 20.4 км үргэлжлэх бөгөөд 23 буудалтай байх юм байна. Ингэснээр замын хөдөлгөөний дундаж хурд 22 хувиар нэмэгдэнэ гэж тооцоолжээ.

Түүнчлэн нийслэлд хот дотор хайрцган дам нуруу бүхий хийцлэлтэй нийт 33 км үргэлжлэх дөрвөн эгнээ Туулын хурдны замын тендерийг арванхоёрдугаар сард багтаан зарлах юм байна. Хурдны зам ашиглалтад орсноор  замын хөдөлгөөний дундаж хурд 13.5 хувиар нэмэгдэхээс гадна Дархан болон Замын-Үүд чиглэлийн дамжин өнгөрөх автотээврийн нэвтрүүлэх чадвар сайжирна. 

Мөн хот доторх хөдөлгөөний ачааллыг бууруулах хоёр түвшний тойрог хурдны авто зам байгуулах зөвлөх үйлчилгээний тендерийг шалгаруулаад байгаа бөгөөд ТЭЗҮ-г 2025 онд бүрэн боловсруулна. Уг авто замыг байгуулснаар хотын төвийн гол гудамж замуудын уулзвар, огтлолцлуудын нэвтрүүлэх чадвар нэмэгдэж,  замын хөдөлгөөний дундаж хурдыг 27 хувиар нэмэх боломжтойг гэж үзжээ.

Харин Туулын хурдны замыг Нисэхийн тууш замтай холбох шинэ гүүрний ажлын тендерийг ирэх онд зарлаж, ажлыг эхлүүлэх бөгөөд Наадамчдын гудамж буюу Яармагийн зам дээгүүр явах босоо тэнхлэгийн гүүрэн байгууламж нь Нэгдүгээр хороолол руу холбогдож, урагшаа Нисэхийн хурдны замтай нийлэх юм байна.

Эдгээр төслүүд буюу трамвай, гүүрэн байгууламж, тойрог болон хурдны зам байгуулах чиглэлд БНХАУ-ын дэд бүтэц, эрчим хүч, санхүү хөрөнгө оруулалтын салбарын аж ахуйн нэгж, байгууллагууд хамтран ажиллах хүсэлтэй байгаагаа илэрхийлжээ.

 

Эх сурвалж: НЗДТГ-ын хэвлэл мэдээлэл, олон нийттэй харилцах хэлтэс