• 1 сарын 23, Пүрэв
|
Уншиж байна ...

Манай орны нутаг дэвсгэрт энэ онд 22,610 удаа газар хөдөлжээ

М.Батчимэг, ikon.mn
2024 оны 12 сарын 5
IKON.MN
зураг
 
ОБЕГ-Зураг: Монгол орны нутаг дэвсгэр болон хилийн ойролцоох бүс нутагт болсон газар хөдлөлтийн төвийн тархалтын зураг

 Зураг: Монгол орны нутаг дэвсгэр болон хилийн ойролцоох бүс нутагт болсон газар хөдлөлтийн төвийн тархалтын зураг

Монгол орны нутаг дэвсгэр болон хил орчмын бүс нутагт 2024 оны 1 дүгээр сарын 01-ний өдрөөс 12 дугаар сарын 05-ны өдрийг дуустал хугацаанд нийтдээ 38,304 удаа газар хөдлөлт болжээ. Үүнээс Монгол орны нутаг дэвсгэрт 22,610 удаа газар хөдлөлт болсон талаар Онцгой байдлын ерөнхий газар /ОБЕГ/-аас мэдээлж дараах мэдээллийг өглөө. 

Эдгээр газар хөдлөлтөөс: 

  • 3.5-4.4 магнитудын хүчтэй газар хөдлөлт 36 удаа,
  • 4.5-5.6 магнитудын хүчтэй газар хөдлөлт 4 удаа бүртгэгджээ. 

Газар хөдлөлтийн хүчийг 8 магнитуд, 12 баллын үнэлгээ шаталбараар үнэлдэг байна. 

Магнитуд гэдэг нь хөрсөн доор, газар хөдлөлт болж байгаа төв хэсгийг хэмжиж байгаа үзүүлэлт бол газрын хөрсөн дээр буюу хүнд болон барилга байгууламжид мэдрэгдэж байгааг баллаар хэмждэг аж. 

  • 2.5 магнитуд зөвхөн багажинд бичигдэнэ.
  • 2.5-5.4 хүн мэдэрнэ, яльгүй гэмтэл үүсэж болно.
  • 5.5-6.0 магнитудад бага зэргийн эвдрэл учруулна.
  • 6.1-6.9 магнитудын хүчтэй бол хот суурин газар эвдрэл учруулна.
  • 7.0-7.9 магнитудад хүчтэй эвдрэл сүйтгэл их,
  • 8 магнитудаас дээш хүчтэй газар хөдлөлт болоход маш хүчтэй буюу Эпицентрийн ойролцоо бүрэн сүйрнэ гэж үздэг байна. 

Газар хөдлөлтийн үед ямар арга хэмжээ авах талаар заавар зөвлөмжийг www.belenbai.mn сайтаас авч болно 

Газар хөдлөлтийн хүч, давтамж сүүлийн жилүүдэд Монгол Улсад төдийгүй дэлхий дахинаа нэмэгдэж байгаа бөгөөд хамгийн сүүлд 2024 оны 12 дугаар сарын 05-ны өдрийн 06 цаг 16 минут 56 секундэд Хөвсгөл аймгийн Ханх сумын 3-р дугаар багийн “Шивдэг” гэдэг газарт (аймгийн төвөөс баруун урд зүгт 286 км-т, сумын төвөөс зүүн зүгт 10 км)-т 5.2 магнитудын хүчтэй газар хөдлөлт болжээ.

Хөвсгөл аймгийн хэмжээнд сүүлийн 10 жилийн хугацаанд бүртгэгдсэн хамгийн хүчтэй газар хөдлөлт 2021 оны 01 дүгээр сарын 12-ны өдөр Хөвсгөл аймгийн Ханх суманд хөдөлсөн 6.5 магнитудын хүчтэй газар хөдлөлт юм.

Газар хөдлөлт, түүнийг дагасан эрсдэл, бэлэн байдлын тухай асуудал нь хүн бүрийн анхаарах ёстой амин чухал сэдэв юм. Иймд иргэд та бүхэн газар хөдлөлтийн өмнө хэрхэн бэлтгэл бэлэн байдлаа хангах, газар хөдлөлтийн үед ямар арга хэмжээ авах талаар заавар зөвлөмжийг www.belenbai.mn сайтаас авч, өөрийгөө болон бусдыг болзошгүй гамшиг ослоос урьдчилан сэргийлэхийг ОБЕГ-аас анхаарууллаа.