Япон улсаас батлан хамгаалах салбартаа тусламж авах дөрвөн улсын тоонд Монгол багтжээ

Япон улсын засгийн газар хөгжлийн ижил чиг баримжаатай орнуудын батлан хамгаалах салбарт тусламж үзүүлдэг OSA (Official Secutiry Assistance) хөтөлбөртөө энэ санхүүгийн жилд Филиппин, Индонез, Монгол, Жибути улсуудыг хамруулахаар болсныг Токиогийн албаны эх сурвалж Бямба гарагт мэдээлжээ.

Ингэхдээ улс бүрийн онцлог хэрэгцээнд нийцсэн ажиглалт, хяналтын тоног төхөөрөмжүүдийг үнэ төлбөргүй нийлүүлэх юм байна.

Сонгогдсон дөрвөн улсад үзүүлэх техник, тоног төхөөрөмжийн нийт үнийн дүн таван тэрбум иен ($33 сая) болох ажээ.

Монгол улсын хувьд агаарын хөдөлгөөнийг хянах, удирдах зориулалттай тоног төхөөрөмжүүдийг авахаар болж байгаа гэнэ.

Орос, Хятад хоёр улстай хил залгадаг Монгол улс бусад улс орнуудтай харилцаагаа өргөжүүлэх замаар хоёр хөршөөсөө хэт хамааралтай байдлаа бууруулахыг хичээж байгаа нь энэ тусламжийг авахад нөлөөлсөн гэнэ.

Эх сурвалж: Yommiuri Shimbun